Կախովկա ՀԷԿ-ի պայթյունը ուկրաինական պատերազմի նոր հարթություն է, հայտարարել է Գերմանիայի կանցլեր Շոլցը, անդրադառնալով ուկրաինական հիդրոկայանի պաթյունի և ամբարտակի փլուզման իրողությանը: Ռուսաստանը կտրականապես հերքում է իր առնչությունն ու հայտարարում, որ դա Ուկրաինայի իրականացրած ահաբեկչությունն է, իսկ Կիևը մեղադրում է Ռուսաստանին: Փաստն այն է, որ հիդրոկայանի ամբարտակը փլուզվել է, ինչը դարձել է ջրհեղեղի պատճառ: Սակայն, ըստ ամենայնի խնդիրը այդ ծանր հետևանքը չէ, այլ նախադեպը, երբ թիրախավորվում է էներգետիկ խոշոր ենթակառուցվածք, որի հետևանքը տեխնածին աղետ է: Իսկ նախադեպը առավել քան վտանգավոր է նրանով, որ ռազմական գործողությունների անմիջական սահմանագծին է Զապորոժիեյի ատոմակայանը:
Միևնույն ժամանակ, ստեղծվում է ընդհանրապես «տեխնածին աղետի» նախադեպ, անկախ, թե ով է դա հրահրողը: Այն, որ ուկրաինական ճակատում իրավիճակը անցնում է լարման նոր ալիքի, արձանագրել էի նախորեի հոդվածում, նշելով, որ դա ավելացնում է նաև մարտահրավերներն ու ռիսկերը կովկասյան ուղղությամբ, այսինքն Հայաստանի ու Արցախի անմիջական անվտանգային միջավայրում: Դրա դրսևորումները անօդաչուներով Ռուսաստանի տարածքի էներգետիկ օբյեկտներին հարվածների ինտենսիվացումն էր: Եվ ահա, դրան հաջորդում է Կախովկայի ՀԷԿ հանդեպ գործողությունը, ուկրաինական պատերազմում ռազմական գործողությունների թիրախավորման և հետևանքների թե մասշտաբը, թե բնույթը բերելով առավել բարձր աստիճանի:
Միաժամանակ, ԱՄՆ պաշտպանության նախարար Օստինը հայտարարել է, որ պատերազմը դա անորոշություն է և որևէ արդյունք երաշխավորված կամ ապահովված չէ, հետևաբար Ուկրաինային օժանդակության հարցում արևմտյան երկրները պետք է պատրաստ լինեն աջակցել այնքան, որքան անհրաժեշտ է: Իսկ այն, թե որքան անհրաժեշտ կլինի, Օստինը համարել է հենց անորոշ: Ահա այս ֆոնին է, որ բավականին որոշակիանում են հրադադարի խախտման վերաբերյալ Հայաստանի զինուժին և Արցախի ՊԲ-ին վերագրվող ադրբեջանական պաշտոնական ապատեղեկատվությունները, միաժամանակ նաև հենց ադրբեջանական զինուժի կրակոցները: Բաքուն զգում է Ուկրաինայում «վառոդի» նոր չափաքանակի հոտը, իսկ ուկրաինական անորոշությունը Ադրբեջանի համար արդեն ավելի քան մեկ տարի բավականին որոշակի խնդիրներ լուծելու «պղտոր ջուրն» է: Ի դեպ, նույն համատեքստում է նաև Ադրբեջանը սրել հռետորաբանությունը Իրանի հանդեպ, կայացնելով նաև մի քանի կոշտ որոշումներ ավիափոխադրումների սահմանափակման առնչությամբ, իսկ իր քաղաքացիներին հորդորել չայցելել Իրան:
