Իրանի ԱԳՆ-ն հաստատել է տեղեկությունն այն մասին, որ Էր Ռիադում Իսլամական Հանրապետության դեսպանությունը հունիսի 6-ից կվերսկսի աշխատանքը։ Ինչպես տեղեկանում ենք ТАСС գործակալությունից, այս մասին ասվում է գերատեսչության պաշտոնական ներկայացուցիչ Նասեր Քանաանիի հայտարարության մեջ։
Քանաանին նշել է նաև Ջիդդայում հյուպատոսարանի բացման մասին:
«Իրանի Իսլամական Հանրապետության և Սաուդյան Արաբիայի միջև հարաբերությունների վերականգնման վերաբերյալ երկկողմ համաձայնագրերի կատարման գործընթացի ավարտին երեքշաբթի՝ հունիսի 6-ին, և չորեքշաբթի՝ հունիսի 7-ին, պաշտոնապես կբացվեն Էր Ռիադում Իրանի դեսպանությունը, Ջիդդայում գլխավոր հյուպատոսությունը և Իսլամական համագործակցության կազմակերպությունում մշտական ներկայացուցչությունը»,- ասված է նախարարության Telegram ալիքում հրապարակված հաղորդագրության մեջ։
Ինչպես ավելի վաղ հաղորդել էր «Արմենպրես»-ը, դիվանագիտական աղբյուրը AFP-ին հայտնել էր, որ հունիսի 6-ին տեղի կունենա Սաուդյան Արաբիայում Իրանի դեսպանատան բացումը՝ նորանշանակ դեսպան Ալիռեզա Էնայաթիի ներկայությամբ:
Սաուդյան Արաբիան Իրանի հետ հարաբերությունները խզել էր 2016 թ.-ին, երբ Թեհրանում թագավորության դեսպանատունը և Մաշհադում հյուպատոսարանը ենթարկվել էին ցուցարարների կողմից հարձակման: Իրանցիների դժգոհության առիթ էր դարձել շիա հոգևորական Նիմր ալ Նիմրի մահապատիժն Էր Ռիադի կողմից:
