2023 թվականի առաջին եռամսյակում ՀՀ պետական բյուջեի ծախսերը կազմել են 422.7 մլրդ դրամ կամ ծրագրված ցուցանիշի 76.5%-ը: Շեղումը կազմել է 130 մլրդ դրամ, որը հիմնականում արձանագրվել է ՀՀ պաշտպանության (52.6 մլրդ դրամ), ՀՀ տարածքային կառավարման և ենթակառուցվածքների (18.4 մլրդ դրամ), ՀՀ աշխատանքի և սոցիալական հարցերի (11.2 մլրդ դրամ), ՀՀ կրթության, գիտության, մշակույթի և սպորտի (8.4 մլրդ դրամ), ՀՀ առողջապահության (7.7 մլրդ դրամ), ՀՀ ֆինանսների (5.7 մլրդ դրամ), ՀՀ էկոնոմիկայի (5 մլրդ դրամ) նախարարությունների և ՀՀ ոստիկանության (6.1 մլրդ դրամ) պատասխանատվությամբ իրականացվող ծրագրերում ,- այս մասին նշված է ՀՀ 2023 թվականի առաջին եռամսյակի պետական բյուջեի կատարման վերաբերյալ տեղեկանքում։
Պետական բյուջեի փաստացի ծախսերում ամենամեծ տեսակարար կշիռները՝ 38.6% և 14.1%, ունեցել են համապատասխանաբար ՀՀ աշխատանքի և սոցիալական հարցերի նախարարության և ՀՀ պաշտպանության նախարարության պատասխանատվությամբ իրականացվող ծրագրերը:
2022 թվականի առաջին եռամսյակի համեմատ ՀՀ պետական բյուջեի ծախսերն աճել են 6.5% ով կամ 25.9 մլրդ դրամով։
Նախագահի լիազորությունների իրականացման ապահովման ծախսերը 2023 թվականի առաջին եռամսյակում կատարվել են 68.2% ով՝ կազմելով 228 մլն դրամ: Նախորդ տարվա առաջին եռամսյակի համեմատ հանրապետության նախագահի աշխատակազմի ծախսերն աճել են 2.8%-ով կամ 6.3 մլն դրամով, որը հիմնականում արձանագրվել է հանրապետության նախագահի գործունեության և ներկայացուցչականության ապահովման ծախսերում:
ՀՀ ազգային ժողովի ծախսերը 2023 թվականի առաջին եռամսյակում կատարվել են 56.2%-ով՝ կազմելով 937 մլն դրամ: Նախորդ տարվա առաջին եռամսյակի համեմատ ՀՀ Ազգային ժողովի ծախսերն էական փոփոխություն չեն կրել:
ՀՀ Վարչապետի աշխատակազմի պատասխանատվությամբ 2023 թվականի առաջին եռամսյակում կատարվել է պետական բյուջեի 8 ծրագիր: Ծախսերը կազմել ենշուրջ 2.8 մլրդ դրամ կամ ծրագրի 62.4% ը: Նախորդ տարվա առաջին եռամսյակի համեմատ ՀՀ Վարչապետի աշխատակազմի պատասխանատվությամբ իրականացվող ծրագրերի գծով ծախսերն աճել են 1.1% ով կամ 29.5 մլն դրամով:
ՀՀ արտաքին գործերի նախարարության պատասխանատվությամբ 2023 թվականի առաջին եռամսյակում կատարվել է պետական բյուջեի 5 ծրագիր, որոնց գծով ծախսերը կազմել են 3.6 մլրդ դրամ կամ ծրագրված ցուցանիշի 91.6% ը: Նախորդ տարվա նույն ժամանակահատվածի համեմատ նախարարության ծախսերի նվազումը 14.3% ով կամ 603.4 մլն դրամով հիմնականում պայմանավորված է օտարերկրյա պետություններում ՀՀ դիվանագիտական ծառայության մարմինների գործունեության կազմակերպման ու իրականացման ծախսերով:
2023 թվականի մարտի 31-ի դրությամբ ՀՀ պետական պարտքը կազմել է 4,232.2 մլրդ դրամ (10,899.4 մլն ԱՄՆ դոլար): ՀՀ դրամով և ԱՄՆ դոլարով արտահայտված` նախորդ տարեվերջի համեմատ ՀՀ պետական պարտքի ցուցանիշներն աճել են անհամաչափորեն` համապատասխանաբար 1.1%-ով և 2.5%-ով: Դա պայմանավորված է եղել 2022 թվականի վերջի և 2023 թվականի մարտ ամսվա վերջի դրությամբ ձևավորված ԱՄՆ դոլար / ՀՀ դրամ փոխարժեքների տարբերությամբ, որը նվազել է 1.3%-ով՝ 393.57-ից դառնալով 388.3: ՀՀ պետական պարտքում 2,484.5 մլրդ դրամը (6,398.3 մլն ԱՄՆ դոլարը) կազմել է արտաքին պարտքը, 1,747.8 մլրդ դրամը (4,501.1 մլն ԱՄՆ դոլարը)՝ ներքին պարտք
