Կրեմլը արձագանքել է Հայաստանի վարչապետ Նիկոլ Փաշինյանի հայտարարությանը, որ Ուկրաինայի պատերազմում Հայաստանը ՌԴ դաշնակիցը չէ: Փաշինյանն այդպես էր արձագանքել CNN prima news հեռուստաընկերությանը Չեխիա կատարած այցի ընթացքում տված հարցազրույցում հնչած հարցին, ասելով, որ ուկրաինական պատերազմում Հայաստանը ոչ մեկի դաշնակիցը չէ, ավելացնելով, որ Հայաստանն ինքն ունի այնքան անվտանգային հոգսեր, որ բացարձակապես չունի հնարավորություն որեւէ կերպ առնչվել եւ ներգրավվել այդ շրջանակից դուրս տեղի ունեցողին: Պեսկովը հայտարարել է, որ ի գիտություն են ընդունել Հայաստանի վարչապետի հայտարարությունը այն մասին, ու ուկրաինական պատերազմում Հայաստանը ՌԴ դաշնակիցը չէ: «Մենք դա ընդունում ենք ի գիտություն: Սա կարևոր հայտարարություն է: Մենք գիտենք, որ Հայաստանի մոտեցումներում կան որոշակի նրբերանգներ Ուկրաինայի շուրջ հակամարտության վերաբերյալ, մենք դրանք հաշվի ենք առնում, գիտենք դրանց մասին: Բայց, իհարկե, մենք շարունակում ենք զարգացնել մեր դաշնակցին հարաբերությունները Հայաստանի հետ», ասել է Պեսկովը:
Խնդիրը բավականին կարեւոր է, հատկապես այն հայտարարության համատեքստում, որ արել է վարչապետ Նիկոլ Փաշինյանը նախորդ շաբաթ Հայաստանում տեղի ունեցած ժողովրդավարական ֆորումի ընթացքում: Փաշինյանը հայտարարեց, որ համաշխարհային դիմակայության պայմաններում Հայաստանի համար մանեւրը դառնում է ավելի ու ավելի բարդ: Այլ կերպ ասած, նեղանում է այն «արահետը», որով Հայաստանը պետք է անցնի աշխարհաքաղաքական թոհուբոհը կամ այլ կերպ ասած՝ համաշխարհային վերաբաժանման այս պատերազմը, խուսափելով դրա մասնակիցների միջեւ ընտրությունից:
Այստեղ շատ կարեւոր է, թե Հայաստանը իր դիրքորոշումները որքանով հասկանալի, բացատրելի կդարձնի ուժային կենտրոնների համար, որոնք վարում են ազդեցության համար թեժ պայքարը: Այդ իմաստով, Կրեմլի խոսնակի արձագանքը գոնե հրապարակային առումով պարունակում է դրական երանգներ, այն իմաստով, որ Հայաստանի համար ուկրաինական հակամարտությունում կարեւոր նրբերանգներն ունեն ընկալում: Միեւնույն ժամանակ, թերեւս կասկածից վեր է, որ Հայաստանի դիրքորոշումն էլ Մոսկվան կդարձնի հայ-ադրբեջանական հարցում իր մոտեցումների փաստարկ, առ այն՝ պայմանական իմաստով, որ Հայաստանի ու Ադրբեջանի հակամարտությունում էլ Մոսկվան Հայաստանի դաշնակից չէ, այլ այսպես ասած չեզոք միջնորդ: Այդ մասին չի հնչում բարձրաձայն, սակայն ըստ ամենայնի Երեւանն ու Մոսկվան ունեն «լռելյայն փաստարկների» փոխանակում: Մենք «դաշնակից» չենք ուկրաինական պատերազմում, իրենք՝ հայ-ադրբեջանական հակամարտությունում:
