Առաջիկա հունիսին ֆուտբոլի Հայաստանի ազգային հավաքականը երկու կարևոր հանդդիպում կանցկացնի 2024 թվականի Եվրոպայի առաջնության ընտրական փուլում։ Հունիսի 16-ին Ուելսի դեմ արտագնա մրցավեճից երեք օր անց մեր ֆուտբոլիստները Երևանում կմրցեն Լատվիայի հետ։ Մարտին տեղի ունեցած Թուրքիայի և Կիպրոսի դեմ հանդիպումներում համոզվեցինք, որ ուկրաինացի մասնագետ Ալեքսանդր Պետրակովին հաջողվել է տեսանելի բարեփոխումներ կատարել ազգային թիմի խաղային օղակներում, բայց․․․։ Հայաստանի հավաքականը շարունակում է գնդակներ բաց թողնել դարպասապահների խայտառակ խաղի պատճառով։ Կիպրոսի դեմ մրցավեճում հյուրերին գոլ նվիրեց «Փյունիկի» ներկայացուցիչ Ստանիսլավ Բուչնևը։ Վերջինս մանկական սխալ էր բաց թողել նաև 2020 թվականի աշխարհի առաջնության ընտրական փուլի Գերմանիայի դեմ խաղում։ Այս դարպասապահը ազգային թիմում անց կացնելով 4 հանդիպում՝ թույլ է տվել երկու անթույլատրելի սխալ։ Կարելի՞ է արդյոք Բուչնևի հետ հույսեր կապել առաջիկա հանդիպումներում։ Պատասխանը կարծում ենք՝ պարզ է։ Կարելի՞ է արդյոք հույսեր կապել Թուրքիայի դեմ խաղում Հայաստանի դարպասը պաշտպանած Արսեն Բեգլարյանի հետ։
Այս դեպքում ևս պատասխանը պարզ է։ «Ուրարտուն» ներկայացնող Բեգլարյանը ոչ միշտ է տեղ գտնում իր թիմի հիմնական կազմում։ Պատասխանատու մրցավեճերում «Ուրարտու»-ի գլխավոր մարզիչը մեկնարկային կազմում վստահում է Մելիխովին։ Եվ ահա «Առաջին լրատվական»-ին հայտնի դարձավ որ առաջիկա հանդիպումներին Պետրակովը ազգային թիմ է հրավիրել «Ալաշկերտի» սերբ դարպասապահ Օգնեյն Չանչարևիչին։ Կիպրոսի դեմ խաղին հաջորդած մամուլի ասուլիսում Հայաստանի հավաքականի գլխավոր մարզիչ Ալլեքսանդր Պետրակովն անդրադառնալով «Ալաշկերտի» դարպասապահ Չանչարևիչին և «Արարատ-Արմենիայի» ներկայացուցիչ Վսեվոլոդ Երմակովին ազգային թիմ ներգավելուն հեռանկարին ասել էր․«Չանչարևիչն արդեն 34 տարեկան է, իսկ ինչ վերաբերում է Երմակովին, պետք է սպասենք մինչև հունիս, որպեսզի հասկանանք այդ հարցի պատասխանը։ Բրազիլիայում հանդես է գալիս 19-ամյա երիտասարդ դարպասապահ, որին հետևում ենք: Պարզապես օվկիանոսից այն կողմ հանդես եկող ֆուտբոլիստների հետ կապված որոշակի դժվարություններ կան: Նա կարող է հանդես գալ Բրազիլիայի Մ20 հավաքականում։ Բայց, ամեն դեպքում, պետք է փորձենք ներգրավել այդ դարպասապահին»։ Մեր տեղեկություններով խոսքը «Գրեմիոյի» երիտասարդական թիմում ելույթ ունեցող Արթուր Կոնեղլյանի մասին է։ Մեր տղեկություներով Կոնղելյանը չի լինիՈւելսի և Լատվիայի դեմ հանդիպումների հայտացուցակում։ Ինչ վերաբերվում է Երմակովին, ապա նա Հայաստանում 5 տարի խաղացել է ընդհատումով։ Մասնավորապես 2014 թվականին այս ֆուտբոլիստը պայմանագիր է կնքել Գյումրիի «Շիրակի» հետ, այնուհետև խաղացել է «Կրասնոդարի» երկրորդ թիմում, «Արմավիրում» ինչպես նաև Իժևսկի «Զենիթում» 2018-ի հուլիսին Երմակովը վերադարձել է «Շիրակ» և մինչ օրս ելույթ է ունենում Հայաստանի առաջնությունում։ Այսինքն, Երմակովի Հայաստանում խաղալու 5 տարի կլրանա միայն հուլիսի։ Վերլուծելով իրավիճակը կարող ենք արձանագարել, որ Չանչարևիչին հրավիրելով Պետրակովը կայացրել է հրատապ և այլընտանքային որոշում։
Սերբ դարպասապահը խաղային որակներով գերազանցում է թե Բեգլարյանին, և թե Բուչնևին։ Այո Չանչարևիչի հետ մեծ հույսեր կապելը ևս ճիշտ չի լինի, բայց ստեղծված իրավիճակում կարծում ենք ճիշտ է այս դարպասապահին ազգային թիմում ներգրավելը։ Ուելսի և Լատվիայի դեմ մեր հավաքաանի դարպասը գոնե կպաշտպանի Չանչարևիչը։ Վերջինս երկար տարիներ խաղալով Հայաստանում մեծ ցանկություն ունի պաշտպանելու մեր ազգային թիմի պատիվը ։Այո ՀՖՖ-ն լուրջ աշխատանք է կատարել ուժեղացնելով հավաքականի կազմը, բայց այդ աշխատանքն ուղղակի ջուրը կընկնի երբ Բեգլարյանը կամ Բուչնևը ոչ ֆուտբոյին շարժումներով գոլեր նվիրեն մրցակիցներին։
Մարտի սկզբին հայտնի դարձավ, որ վերջին տարիների ազգային հավաքականի հիմնական դարպասապահ 36-ամյա Դավիթ Յուրչենկոն պայմանագիր է կնքել ռուսական Մեդիալիգան ներկայացնող «Բեյ Բեգի» սիրողական ակումբի հետ։ Յուրչենկոն այս տարվա սկզբին հեռացել էր Հայաստանի գործող չեմպիոն «Փյունիկից» և թվում է, որ նա կհայտնվի հայկական որևիցե այլ թիմում, բայց․․․։ Այն, որ Յուրչենկոն հայտնվել է սիրողական թիմում, խոսում է նրա խաղային որակների կտրուկ անկման մասին։
