Ալիևի նախօրեի հայտարարությունները բրյուսելյան պայմանավորվածություններից հրաժարո՞ւմ է, հարց է տալիս Հայաստանի վարչապետ Նիկոլ Փաշինյանը, ու դիմում Հայաստանի արտգործնախարար Արարատ Միրզոյանին, ասելով, որ պետք է գործընկերների հետ հստակեցնել այդ հանգամանքը, որպեսզի Հայաստանն էլ իմանա իր հետագա անելիքը: Իսկ Ալիևը, ինչպես հայտնի է, նախօրեին հերթական անգամ սպառնացել էր Արցախին և հայտարարել, որ՝ կարող են անել ինչ ուզեն: Նիկոլ Փաշինյանն ասում է, որ ինքը չի գնահատում այդ հայտարարությունները, բայց դրանք իր համար «հասկանալի չեն» և պետք է պարզել՝ բրյուսելյան պայմանավորվածություններից հրաժարու՞մ են, թե՞ ոչ: Բայց, հատկապես ի՞նչ պայմանավորվածությունների մասին է խոսքը: Հանրային առումով կարիք կա նախ հասկանալ դա:
Բրյուսելի հանդիպումից հետո Շարլ Միշելն արեց ինչ որ հայտարարություններ, ինչ որ համաձայնությունների կամ ցանկությունների, կամ ակնկալիքների մասին, սակայն որևէ հանրային հարթակում չի կոնկրետացվել, թե ի՞նչ է տեղի ունեցել Բրյուսելում, այդ ի՞նչ պայմանավորվածություն է, որից հրաժարումը կարող է գնահատվել Ալիևի ելույթը: Հանրությունը դա կարող էր հասկանալ, եթե Հայաստանի վարչապետը կամ արտգործնախարարը հստակեցնեին, թե՝ օրինակ ի՞նչ են պայմանավորվել ու հատկապես ի՞նչն է խախտում Ալիևը: Բայց, դա կարող է անել նաև Շարլ Միշելը, եթե իհարկե տեսնում է խախտում:
Սակայն, տվյալ պարագայում Շարլ Միշելն ունի արձագանքի և մի պարտավորություն կամ անհրաժեշտություն, որովհետև Ադրբեջանի նախագահը իր հերթական սպառնալիքով, Արցախի հանդեպ ագրեսիվ ու նույնիսկ որոշակի վերջնագրային տոնայնություն պարունակող ելույթով «գրողի ծոցն» է ուղարկել Բրյուսելից հետո Շարլ Միշելի արած այն հայտարարությունը, թե ինքը «խրախուսում» է Ադրբեջանի նախագահին առավել կառուցողական դրսևորումներ ունենալ «նախկին ԼՂԻՄ» հանրության իրավունքների և անվտանգության հարցերում՝ դրական օրակարգ ձևավորելու համար: Ի՞նչ է անում Ալիևը: Ալիևը ներկայացնում է վերջնագիր, անում հայտարարություններ, որոնք պարզապես սպառնալիք են Արցախի ժողովրդի հանդեպ, այլ ոչ թե դրական երկխոսության և քննարկումների դուռ բացող հնարավորություն: Ավելին, Ալիևը հայտարարում է, որ արցախցիները պետք է դաս քաղեն այն հանգամանքից, որ ինքը փակել է Արցախի դուռը: Այս պայմաններում, եթե Շարլ Միշելը փակ պահի իր բերանը, կնշանակի, որ լոկ հայտարարությամբ է Ալիևին խրախոսել ունենալ ավելի դրական վարքագիծ, իսկ գործնականում նա խրախուսում է Ալիևին լինել առավել ագրեսիվ:
