Երեկ Ռուսաստանի Դաշնության վարչապետ Վլադիմիր Պուտինը հարցազրույց է տվել CNN հեռուստաընկերության հայտնի հաղորդավար Լարի Քինգին, որը նրա հայտնի թոք-շոուի վերջին հարցազրույցներից է, քանի որ հաղորդումը շուտով փակվելու է:
Պուտինի հետ հարցազրույցը ցուցադրվելու է վաղը, սակայն CNN-ի կայքում տեղադրվել են մի քանի դրվագներ այդ հարցազրույցից: Մասնավորապես՝ Պուտինը խոսել է Ռազմավարական հարձակողական սպառազինությունների (ՌՀՍ) կրճատման մասին ԱՄՆ հետ ստորագրված պայմանագրերի վավերացման մասին` նշելով, որ եթե դրանք չվավերացվեն, ապա Ռուսաստանը ստիպված կլինի զարգացնել միջուկային սպառազինությունների ծրագիրը: «Դա մեր ընտրությունը չէ,- ասել է Պուտինը,- սակայն մենք ստիպված կլինենք անել դա, եթե չկարողանանք համաձայնության գալ (ԱՄՆ հետ)»: Ըստ ՌԴ վարչապետի՝ չվավերացնելով այդ պայմանագիրը, ԱՄՆ-ն կանտեսի իր իսկ շահերը: Իսկ առանց այդ պայմանագրի Ռուսաստանը ստիպված զինվելու է ընդդեմ «նոր սպառնալիքների»` կապված Եվրոպայում հակահրթիռային համակարգ ստեղծելու ԱՄՆ ծրագրերի հետ:
ՌՀՍ-2 կոչվող պայմանագիրը, որը նախատեսում է միջուկային սպառազինությունների զգալի կրճատում, 2010 թ. ապրիլի 8-ին ստորագրվել է ԱՄՆ և Ռուսաստանի նախագահների կողմից: Սակայն այս պայմանագիրը դեռ չի վավերացվել երկու երկրների խորհրդարանների կողմից:
Մեկնաբանելով WikiLeaks կայքում հայտնված այն տեղեկությունը, համաձայն որի՝ ԱՄՆ պաշտպանության նախարարը, մի փաստաթղթում խոսելով Ռուսաստանի ժողովրդավարացման մասին, ասել էր, թե ռուսաստանյան ժողովրդավարությունը վերացել է, իսկ իշխանությունը կենտրոնացել է անվտանգության ծառայությունների ձեռքում, ՌԴ վարչապետը խորհուրդ է տվել չմիջամտել Ռուսաստանի ժողովրդի կայացրած որոշումներին: Խոսելով ՌԴ նախագահ Մեդվեդևի հետ իր հարաբերությունների և 2012 թ. նախագահական ընտրությունների մասին՝ Պուտինն ասել է, որ իրենք երկուսով կհամաձայնեցնեն որոշումը հաջորդ նախագահական ընտրությունների վերաբերյալ: «Տեսնենք, մինչև ընտրությունները դեռ բավականին ժամանակ կա»,- ասել է վարչապետը: Մեկնաբանելով այն հայտարարությունները, թե Մեդվեդևն իրական իշխանություն չունի երկրում, Պուտինն ասել է՝ «դրանով փորձում են վարկաբեկել մեզանից մեկին»:
Մեկնաբանություններն ու մեջբերումները վերցված են CNN-ի, РБК-ի և РИА-Новости-ի կայքերից:
