ԱՄՆ-ի առևտրի նախարարությունը հաղորդագրություն է տարածել ամերիկյան պատժամիջոցների ներքո գտնվող ընկերությունների ցանկի ընդլայնման մասին։ Արդյունքում՝ պատժամիջոցներ և սահմանափակումներ են սահմանվել ավելի քան յոթ տասնյակ կազմակերպությունների նկատմամբ, այդ թվում՝ Երևանում գրանցված Medisar ՍՊԸ-ի:
Հայաստանում գրանցված մեկ այլ ընկերություն՝ «Տակո» ընկերությունը, վերջին մեկ տարում երկու անգամ հայտնվել է ամերիկյան պատժամիջոցների տակ։
Այս առնչությամբ tvyal.com կազմակերպության ղեկավար, տնտեսագետ Աղասի Թավադյանն «Առաջին լրատվական»-ի հետ զրույցում նշեց, որ այդ ցանկում գտնվում են նաև ԵԱՏՄ այլ երկրների կազմակերպություններ, օրինակ, Ղազախստանում գրանցված ավելի քան 20 կազմակերպություններ այդ պատժամիջոցների տակ են. «Դա նրանից է, որ Հայաստանից բավականին մեծ քանակությամբ ապրանքներ վերարտահանվել են Ռուսաստան: Պատժամիջոցների պատճառով շատ ապրանքներ չեն կարողացել մուտք գործել Ռուսաստան, իսկ մենք ՌԴ-ի հետ ԵԱՏՄ-ի ազատ տնտեսական գոտում ենք, և այս ընթացքում ռուսական գործարարները տեղափոխվեցին Հայաստան և Հայաստանով որոշ ապրանքներ սկսեցին տեղափոխել Ռուսաստան: Այսինքն՝ դարձել ենք տարանցիկ երկիր: Եթե 2021-ին արտահանումը կազմել է 3 մլրդ դոլար, որից իմ հաշվարկով ընդամենը 5 տոկոսն է եղել վերարտահանումը, ապա 2022-ին արտահանման մոտ 80 տոկոսով աճ ենք ունեցել, մեր արտահանումը կազմել է 5,3 մլրդ դոլար, որից իմ հաշվարկով 1,5 մլրդ-ը կամ 26 տոկոսը եղել է վերարտահանում: Մենք հիմնականում վերարտահանել ենք տեխնիկա, ավտոմեքենաներ և նմանատիպ ապրանքներ:
Հիմնականում պատժամիջոցների տակ են հայտնվել այն կազմակերպությունները, որոնք վերարտահանել են այն տեխնոլոգիաները, միկրոչիպերը, միկրոպրոցեսորները, որոնք կարող են օգտագործվել ռազմական արդյունաբերության մեջ»,-ասաց Թավադյանը:
