Արցախի նախկին պետնախարար Ռուբեն Վարդանյանի կինը՝ Վերոնիկա Զոնեբանդը, հանդես է եկել հայտարարությամբ, որտեղ նշում է, որ մայիսի 25-ը Ռուբենը դառնում է 55 տարեկան․ «Ինչպես գիտեք, անցած տարվա սեպտեմբերին Ռուբենը դժվար որոշում կայացրեց, այդ թվում նաև մեր ընտանիքի համար, տեղափոխվել Արցախ, որպեսզի մոտ լինի իր ժողովրդին»,-գրել է Վերոնիկա Զոնեբանդը։ Նա նշել է, որ իրենց ընտանիքը շարունակում է իրականացնել այն ծրագրերը, որոնք սկսել ենք գործընկերների հետ Հայաստանում, Ռուսաստանում և այլ երկրներում, և Ռուբենը դեռևս մեծ ուշադրություն է դարձնում դրանց։
«Գիտենք, որ ձեզանից շատերը մտածում են, թե ինչպես շնորհավորել Ռուբենին։ Նրա ծննդյան լավագույն նվերը կլինի ձեր աջակցությունը ստորև ներկայացված նախագծերից որևէ մեկում: Դուք կարող եք ընտրել այն ուղղությունը, որը հատկապես մոտ է ձեզ»,-ընդգծել է Ռուբեն Վարդանյանի կինը:
ԳԽ նախկին պատգամավոր Ազատ Արշակյանն «Առաջին լրատվական»-ի հետ զրույցում, անդրադառնալով այս հայտարարությանը, նշեց. «Շատ բնական է, որ տիկինը այդպիսի կոչով է դիմել հասարակությանը և աշխարհին, մենք ճանաչում ենք նրանց հենց այդ բնագավառում: Հայտնի է, որ Ռուբեն Վարդանյանը երաժիշտ չէ, ճարտարապետ չէ, նա փող հավաքող է, փող աշխատող է, դա հենց իրենց գործն է, դա իրենք լավ են արել։ Եվ ճիշտ են անում, իսկ այ քաղաքականությունն իրենց գործը չէ, նրա մոտ չստացվեց, ձախողվեց, նույնիսկ կասեի, որ իրենց կազմակերպության անունը՝ «Ապրելու երկիր» կուսակցություն, նույնպես քաղաքական չէ, դա նման է աբորիգենների կազմակերպության, գոնե Ավետյանց երկիր լիներ: Եթե դա ավետյաց երկրի հեգնանքն է, դա իրենց մոտ չի ստացվել, բայց փող հավաքելն իրենց մոտ կստացվի։ Հնարավոր է որ փող չտան, բայց մարդը հայտ է ներկայացնում այնտեղ ինքն արհեստավարժ է»:
Ազատ Արշակյանը նկատեց, որ փողը և առողջապահությունը սիրում են գաղտնիություն. «Նրանք վրիպել են, նրանք պետք է փող բաժանեն։ Երբ ասում ենք Քըրք Քըրքորյան, հասկանում են բարերար, փող բաժանող, Ռուբեն Վարդանյանը նույնպես հայտ է ներկայացրել աշխարհին, որ ֆիլանտրոպ է, փող բաժանող է, հիմա փող է հավաքում, անհասկանալի է: Ձեր ակցիան՝ «Ավրորա» մրցանակաբաշխությունը, դուք ներկայացել եք որպես փողատեր և փող բաժանող և դա հարգելի գործ է։
Իսկ հիմա նոր ճակատով հանդես գալու հայտարարություն է արել, որի համար գումար պետք չէ, գաղափար է պետք քաղաքականության մեջ, ծրագրեր, որոնք խնդիրներ են լուծելու, առաջացած մարտահրավների պատասխան ծրագրեր են պետք: Իսկ «Ապրելու երկիր» պիտակի տակ անգամ չարժի փող դնել, դրա համար իրենք գումար չեն ուզում դնել, մեզնից են ուզում վերցնել իրենց ծրագրերը իրականացնելու համար»,-հայտարարեց Ազատ Արշակյանը՝ հավելելով, որ «Ապրելու երկիր»-ը գայթակղիչ չի կարող լինել:
«Իսկ ինչպիսի՞ երկիր, սա մոսկովյան իմպերիական հանրության վերաբերմունքն է, ծայրագավառին, աբորիգենների համար ի՞նչ կուսակցություն։ Մոսկովյան իմպերիալիստները ծայրագավառի տեղաբնիկների համար հորինել են անուն։ Իբր Արցախում խնդիրները քիչ էին, հիմա էլ իմպերիայից են գաղափարակիրները գալիս։ Առաքյալ են իրենց զգում, բայց կարծեմ առաքյալները փող չէին հավաքում։
Ծնունդը ցանկալի կլիներ նշել արցախյան մարտական դիրքում՝ զինվորականների հետ պայոկ ուտելով: Եթե դոք կիսում եք Արցախի ժողովրդի հետ իր առօրյան, լինեիք այնտեղ։ Եվ սա կարելի էր անել ի սկզբանե: Հակագովազդ է, որ հարուստ մարդը փող է հավաքում, տիկինը հակագովազդ է արել ամուսնուն։ Հիմա իրենց կյանքը թողել եկել են, թող վերադառնան իրենց սովորական կյանքին։Պատվավոր նահանջի գաղափար է, փող չուզեցին ներդնել, գաղափար չունեն, և սա մնաք բարովի ակցիա է»,-ընդգծեց Ազատ Արշակյանը:
