Ֆուտբոլի Ռուսաստանի գավաթի խաղարկության ռեգիոնների ուղու եզրափակիչում նախօրեին «Կրասնոդարը» 2։1 հաշվով առավելության հասավ Եկատերինբուրգի «Ուրալի» նկատմամբ և դուրս եկավ հիմնական եզրափակիչ: «Կրասնոդարի» կազմում 9-րդ րոպեին գոլային փոխանցման հեղինակ դարձավ Հայաստանի ազգային հավաքականի կիսապաշտպան Էդուարդ Սպերցյանը։ Վերջինս անկյունայինից կատարած փոխանցմամբ օգնեց գոլի հեղինակ դառնալ բրազիլացի պաշտպան Կայոյին: Հունիսի 11-ին «Կրասնոդարը» սուպերեզրափակում Ռուսաստանի գավաթը կվիճարկի Մոսկվայի ԲԿՄԱ-ի հետ։ Ավելի վաղը «Կրասնոդար» սեփական հարկի պայքարից դուրս էր թողել Սամարայի «Կրիլյա Սովետով»: Հանդիպման հիմնական ժամանակն ավարտվել է 2:2 հաշվով: «Կրասնոդարի» կազմում 32-րդ րոպեին աչքի էր Սպերցյանը: Թիմերը հաղթողին որոշել են հետխաղյա 11-մետրանոց հարվածաշարում, որտեղ ավելի դիպուկ են գտնվել տանտերերը: Սպերցյանը ճանաչվել էր հանդիպման լավագույն ֆուտբոլիստ: Մինչ այդ «Կրասնոդարը» կրկին հետխաղային 11-մետրանոցներով հաղթել էր «Ռոստովին»: Խաղի Հիմնական ժամանակն ավարտվել էր ոչ ոքի՝ 1:1: 23-րդ րոպեին հաշիվը բացել էր Սպերցյանը։ Գնանք ավելի հետ․ Ռուսաստանի գավաթի խաղարկության քառորդ եզրափակիչի ԲԿՄԱ դեմ պատասխան խաղում հայ ֆուտբոլիստը ևս աչքի էր ընկել փայլուն խաղով, դարձել հանդիպման միակ և հաղթանակ գոլի հեղինակը։ Այս հաղթանակը սակայն չէր բավարարել «Կրասնոդարին» դուրս գալ կիսաեզրափակիչ։
Առաջին խաղում Մոսկովյան թիմը հաղթել էր 3։0 հաշվով։ Ընթացիկ մրցաշրջանում Սպերցյանը անցկացրած 37 խաղում դարձել է 14 գոլի և 12 գոլային փոխանցման հեղինակ: «Ռոստովի» նկատմամբ տարած հաղթանակից հետո արձագանքելով կարիերան եվրոպական թոփ-ակումբում շարունակելու տեղեկություններին, Սպերցյանը հայտարարել էր, որ չի ցանկանում առանց տիտղոս նվաճելու հեռանալ «Կրասնոդարից»։ «Եվրոպա տեղափոխվելու մասին դեռևս չեմ մտածում: Ես դեռ չեմ վերադարձրել «Կրասնոդարին» այն, ինչ ինձ տվել է ակումբը: Ես խաղացել եմ ընդամենը մեկ ու կես մրցաշրջան: Երբ փոքր էի, նայում էի Չեմպիոնների լիգան, երազում էի խաղալ այնտեղ: Երբ հայտնվեցի ակադեմիայում, երազանքս փոխվեց. հայտնվել «Կրասնոդարի» գլխավոր թիմում ու այնտեղ ավարտել կարիերաս: Առայժմ մենք «Կրասնոդարի» հետ ոչինչ չենք հաղթել: Այդքան էլ չեմ ուզում հեռանալ առանց տիտղոսների: Բայց եթե առաջարկ լինի, գրեթե ամեն ինչ կախված կլինի ակումբի կարծիքից»,- ասել էր Սպերցյանը: Փաստենք, որ Սպերցյանը ընթացիկ մրցաշրջանում «Կրասնոդարի» կազմում չի նվաճի Ռուսաստանի գավաթը։ Մեր ֆուտբոլիստի ֆանտաստիկ գոլը ԲԿՄԱ-ի դարպասը բավարար չէր առաջ շարժվելու համար։ Ռուսաստանի Պրեմիեր լիգայում էլ Կրասնոդարի թիմը 27-րդ տուրից հետո 43 միավորով միայն 6-րդ հորիզոնականում է։Առաջին տեղում գտնվող «Զենթին» ունի 65 միավոր։ Կարծում ենք պարզ է նաև, որ Սպերցյանը այս տարի տիտղոս չի նվաճի նաև Ռուսաստանի առաջնությունում։ Չմոռանանք, որ ռուսական թիմերը զրկված են ՈւԵՖԱ-ի հովանու ներքո անցկացվող մրցաշարերին մասնակցելու իրավունքից։
Ուստի Սպերցյանը չունի հնարավորություն «Կրասնոդարի» հետ տիտղոս նվաճելու նաև միջազգային ասպարզում։ Սպեցրյանի համար «Կրասնոդարի» հետ տիտղոս նվաճելու և երազանքն իրականություն դարձնելուալ վերջին և միակ հնարավորությունը հունիսի 11-ին կայանալիք Ռուսաստանի գավաթի սուպերեզրափակիչն է։ Մեր կիսապաշտպանին ընդամենը մեկ քայլ է հարկավոր երազանքն իրականություն դարձնելու համար։ Արդեն իսկ խոսվում է, որ այդ օրը Սպեցրյանը վերջին հանդիպումը կանցկացնի «Կրասնոդարի» կազմում, որից հետո կհայտնվի եվրոպական թոփ ակումբում։
Մինչ այդ «Կրասնոդարը» Ռուսաստանի առաջնությունում կանցկացնի 3 հանդիպում։ Եզափակիչ հանդիպումից հետո Սպերցյանը կմիանա Հայաստանի ազգային հավաքականին, որը հունիսի 16-ին և 19-ին Եվրոպայի առաջնության ընտրական փուլում մրցելու է համապատասխանաբար Ուելսի և Լատվիայի հետ։
