Եվրոպայի անվտանգության և համագործակցության կազմակերպությունում Ղազախստանի նախագահության ընթացքում խնդիր էր դրվել կազմակերպությունը դուրս բերել ճգնաժամից,- ԵԱՀԿ այսօր մեկնարկած գագաթնաժողովի ժամանակ իր ողջույնի խոսքում հայտարարել է Ղազախստանի նախագահ Նուրսուլթան Նազարբաևը՝ հայտնում են գագաթնաժողովի աշխատանքները լուսաբանող հայաստանյան գործակալությունները:
Նրա խոսքերով` եվրոպական անվտանգությունը ոչ թե այլաբանություն է, այլ աշխարհաքաղաքական փաստ, և այդ հարցում ԵԱՀԿ-ն առանցքային նշանակություն ունի: Ղազախստանի նախագահի ներկայացմամբ` իրենք խնդիր էին դրել կազմակերպությունը դուրս բերել ճգնաժամից, և այդ հարցում եղած արդյունքների մասին դատողություններ կարելի է անել ընդամենը մի քանի շաբաթ անց, երբ ավարտվի ԵԱՀԿ-ում Ղազախստանի նախագահությունը: «Բայց ես հորդորում եմ հաջորդ նախագահողներին` չթուլացնել ակտիվությունը»,- նշել է Նուրսուլթան Նազարբաևը` ընդծելով, որ տասնմեկամյա ընդմիջումից հետո երկրների ղեկավարների մակարդակով գագաթնաժողովի անցկացումն արդեն խորհրդանշում է կազմակերպության վերաակտիվացումը:
Նախագահ Նազարբաևի մեկնաբանմամբ` ԵԱՀԿ-ն աշխարհագրական վերանայման, կառուցվածքային ու բովանդակային փոփոխությունների միջոցով պետք է հետամուտ լինի Եվրոպայում և ողջ եվրասիական տարածքում անվտանգության ամրապնդմանը: Նրա խոքերով` համաեվրոպական անվտանգության ընկալումը նախնական փուլում տարածվում էր Եվրոպայի վրա, իսկ հետագայում այն ընդգրկեց Վանկուվերից Վլադիվոստոկ ընկած տարածությունը: Կազմակերպության կայացման երրորդ փուլն, ըստ Ղազախստանի ղեկավարի, պետք է ներառի օվկիանոսից օվկիանոս ընկած տարածքները` Ատլանտյանից մինչև Խաղաղ, Հյուսիսայինից` մինչև Հնդկական, այսինքն` ողջ Եվրասիան:
Ինչ վերաբերում է կառուցվածքային-բովանդակային փոփոխություններին, ապա Ղազախստանի նախագահն առաջարկել է ԵԱՀԿ կազմում նոր ինստիտուտների ստեղծման միջոցով ակտիվ ջանքեր գործադրել էներգետիկ, տնտեսական անվտանգության, շրջակա միջավայրի պահպանության, միջազգային կազմակերպված հանցավորության դեմ պայքարի և բազմաթիվ այլ բնագավառներում: Անդրադառնալով կազմակերպության առջև ծառացած մարտահրավերներին՝ նա մատնանշել է ԵԱՀԿ անդամ երկրների գլխավոր խնդիրը` հաղթահարել տարաձայնությունները, ամրապնդել վստահությունը: