Վաշինգտոնում, Բրյուսելում, Մոսկվայում անցկացվող բանակցությունները ինչ որ իմաստով միմյանց շարունակություն են, բայց իհարկե ամեն հարթակ ունի իր յուրահատկությունները, հայտարարել է Հայաստանի փոխարտգործնախարար Պարույր Հովհաննիսյանը լրագրողների հետ զրույցում: Տարբեր մայրաքաղաքների հանգամանքը արժանանում է մեծ ուշադրության և այստեղ առավել լայն ընկալումն այն է, որ դրանք մրցակցում են միմյանց հետ, ու այդպիսով էլ նաև առնվազն խանգարում միմյանց՝ եթե անգամ չեն կարողանում առաջ տանել և հաստատել իրենց մոտեցումները: Իհարկե թե ԱՄՆ, թե Եվրամիությունը հայտարարում են, որ այդ հարցում չեն մրցակցում Ռուսաստանի հետ, սակայն մյուս կողմից միամիտ կլիներ մտածել, թե նրանք հայտարարելու էին մրցակցելու մասին, կամ այդպիսի մտադրություն ունենալու մասին: «Սատանան մանրուքների մեջ է», ասում են բրիտանացիները, որոնք էլ թերևս հենց այն «յուրահատկություններն» են, որոնց մասին խոսում է Հայաստանի դիվանագետը: Դրանց առնչությամբ մենք իհարկե առավելապես ունենք կռահումներ կամ ենթադրություններ, քանի որ ստույգ տեղեկատվությունը հանրայնորեն հասանելի չէ:
Որքան էլ պաշտոնական Երևանը հայտարարում է, որ ինչ խոսում է հրապարակավ, այն էլ քննարկում է բանակցային գործընթացում, այդուհանդերձ նույն կերպ միամտություն է մտածել, թե դա իսկապես այդպես է: Այլ հարց է, որ հրապարակում խոսվողն ու բանակցային սեղանների շուրջ քննարկվողը՝ բայց որոշակի մասով չբարձրաձայնվողը իրար հետ տրամագծային հակասության մեջ չեն: Այդ իմաստով, ի դեպ, միմյանց հետո տրամագծային հակասության մեջ չեն Վաշինգտոնի, Բրյուսելի կամ Մոսկվայի քննարկումներում առկա հարցերն ու բովանդակային կետերը, իհարկե առանձին դետալների բացառությամբ: Բուն հակասությունն այն է, թե ով է տնօրինելու բովանդակությունը:
Մեծ հաշվով, ահա այդ պայքարն է, որ բերում է արդեն դետալային յուրահատկությունների: Դրանով հանդերձ, Երևանի համար իհարկե առնվազն տակտիկական, իսկ որոշ իմաստով նաև ստրատեգիական խնդիր է այդ բոլոր մայրաքաղաքներն ու քաղաքները շարունակությամբ «շղթայելը»: Դա է, որ Հայաստանին կընձեռի այդ սուբյեկտների հակասությունների և մրցակցության միջև առավելագույնս ճկուն լինելու հնարավորություն, փորձելով առավելագույնս զերծ մնալ կամա, թե ակամա այս կամ այն ճամբարում հայտնվելու կամ «շեմ տրորելու» ռիսկերից: Գործնականում, Ադրբեջանի սադրանքները միտված են այդ «շղթան» կտրելուն: Այդ իմաստով հատկանշական է, որ Ադրբեջանի սադրանքը հաջորդում է մի շարք նշանային իրողությունների, այդ թվում Հայաստանի ԱԳՆ-ում մայիսի 8-ին տեղի ունեցած երեք հանդիպումներին, հաջորդաբար՝ ՌԴ, ԱՄՆ և Ֆրանսիայի դեսպանների հետ:
