Երուսաղեմի հայոց պատրիարքի շուրջ օղակը գնալով սեղմվում է։ Դեռ երկու տարի առաջ Նուրհան Պատրիարքը և պարետ Երիցյանը գործարք էին կնքել հրեա գործարարի հետ և 99 տարով վարձակալության հանձնել «Կովերի պարտեզ» կալվածքը: Հատկանշական է, որ 99 տարով տարածքը վարձակալությամբ տալու համաձայնագիրն անօրինական է հենց այն առումով, որ որևէ մեկն իրավունք չունի հայկական կալվածքներն 99 տարով վարձակալության տալ, պատրիարքության կանոնադրությամբ, առավելագույն ժամկետը 49 տարին է:
Ի դեպ, Երուսաղեմի Նուրհան Պատրիարքը և Պարետ Վարդապետ Երեցյանը տարբեր գործարքներ, այդ թվում՝ Երուսաղեմի Պատրիարքության հասութաբեր կալվածքները, միասին էին վաճառում կամ երկարաժամկետ վարձակալության հանձնում։
Չնայած գործարքը չեղարկելու բազմաթիվ կոչերին և հորդորներին՝ պատիրարքը մնաց անդրդվելի։ Միայն ամիսներ առաջ Երուսաղեմի Հայոց Նուրհան արքեպիսկոպոս Մանուկյանի որոշմամբ՝ Սուրբ աթոռի կալվածքների տեսուչ է նշանակվել պատրիարքության դիվանապետ Կորյուն վարդապետ Բաղդասարյանը։
Հունվարին, սակայն, լարվեցին Երուսաղեմի Նուրհան Պատրիարքի և Պարետ Վարդապետ Երեցյանի հարաբերությունները։ Արդյունքում Նուրհան Պատրիարքը ազատել է պաշտոնից Պարետ վրդ․ Երեցյանին կալվածքների գրասենյակի ղեկավարի պաշտոնից։
Նշվում էր, որ պատրիարքի և Պարետի հարաբերությունները լարվել էին նաև Կովերի պարտեզի հետ կապված․ «Նուրհան պատրիարքը անդրադարձել է, որ պայմանագիրը վտանգ է և պետք է լուծել հարցը, և հիմա Նուրհան պատրիարքը և Սևան արք. Ղարիպյանը պետք է հետ վերցնեն ստորագրությունը պայմանագրից։ Դա հնարավոր է, քանզի Նուրհան պատրիարքի ստորագրությունը ամենակարևորն է: Եթե պատրիարքը հետ վերցնի իր ստորագրությունը, ավելի հեշտ կարող են պայմանագիրը չեղարկել։
Հատկանշական է, որ Կովերի պարտեզի հետ կապված նախօրեին երեկոյան Հորդանանի թագավոր Աբդալլա 2-րդը և Պաղեստինի նախագահ Մահմուդ Աբբասը հայտարարեցին, որ Նուրհան պատրիարքն իշխանազուրկ պատրիարք է և որ նրան այլևս որպես պատիրարք չեն ճանաչում, քանի որ ապօրինի գործարք է իրականացրել։
Նրանք համատեղ հայտարարություն են տարածել՝ տեղեկացնելով որ Նուրհան Մանուկյանին չեն ճանաչում որպես Երուսաղեմի Հայ Ուղղափառ Եկեղեցու պատրիարք:
Հայտարարության մեջ ասվում է, որ երկու երկրներն այս որոշումը ընդունել են Նորին Մեծություն թագավոր Աբդալլահ II-ի և Պաղեստինի նախագահ Մահմուդ Աբասի ցուցումներից հետո այն բանից հետո, երբ պատրիարք Մանուկյանը առանց համաձայնության և խորհրդակցության, անշարժ գույքի հետ կապված միջոցներ և գործարքներ է կատարել, որոնք կազդեն Սուրբ քաղաքի ապագայի վրա։
Հայտարարության մեջ նշվում է, որ Հորդանանի և Պաղեստինի որոշումը կայացվել է «գործարքից» հետո, որը կապված է «Կովերի այգի» անունով հայտնի Ալ-Բուստան տեղանքի և դրա շրջակայքի հետ, որը տարածվում է մինչև Բաբ Ալ-Խալիլում գտնվող «Ալ-Քիշլա» շենքը և որը կազմում է հայկական թաղամասի մեծ մասը: Նշվում է, որ պատրիարք Մանուկյանին խնդրել են դադարեցնել որևէ միջոց, որը կազդի այս գույքի պատմաիրավական կարգավիճակի վրա, որը կփոխի դրանց ժողովրդագրական և աշխարհագրական բնույթը, սակայն նա չի պատասխանել դրանցից որևէ մեկին։
Կողմերը հաստատել են, որ Հայկական թաղամասը հանդիսանում է Հին քաղաքի անբաժանելի մասը՝ որպես օկուպացված տարածք, որի նկատմամբ կիրառվում են ՄԱԿ-ի Անվտանգության խորհրդի և ՄԱԿ-ի Գլխավոր ասամբլեայի կողմից ընդունված բանաձևերը, այդ թվում՝ Անվտանգության խորհրդի 1515, 476, 338, 242, 2334 բանաձևերը, և այլ համապատասխան միջազգային բանաձևեր:
Ըստ հայտարարության՝ ՄԱԿ-ի Կրթության, գիտության և մշակույթի կազմակերպության (ՅՈՒՆԵՍԿՕ) գործադիր խորհուրդը մի քանի որոշում է կայացրել՝ Հին քաղաքը և նրա պարիսպները վտանգի տակ գտնվող Համաշխարհային ժառանգության ցանկում համարելով, և որ Մանուկյան պատրիարքի գործողությունները բացահայտ խախտում են համապատասխան միջազգային դաշնագրերը և որոշումները, որոնք ուղղված են Երուսաղեմի ստատուս քվոյի պահպանմանը և Երուսաղեմի իսկական հայկական ժառանգության պաշտպանությանը։
Ի դեպ, Կովերի պարտեզի հետ կապված Հայր Պարետին ոչ միայն հեռացրել էին պաշտոնից, այլ կարգալույծ արել։ Վերջինս որոշել էր լքել երկիրը, քանի որ պնդում է՝ իրեն քավության նոխազ են դարձրել։ Նա որոշել է լքել երկիրը, հայ համայքնի ներկայացուցիչները, սակայն, նրան թույլ չեն տվել։ քանի որ նշում են, որ պետք է նաև պատասխատավության ենթարկվի ապօրինի ստորագրության համար։
