ՌԴ Պետդումայում մեկ ամիս առաջ քննարկվեց և ընդունվեց ռազմական հաշվառման մասին նոր լրացումներ կատարելու նախագիծը, որը նախատեսում է երկրից ելքի արգելք բոլոր ծանուցագիր ստացածների համար։ Քաղաքացիներին, որոնք ենթակա են զինվորական ծառայության ու զինկոմիսարիատներից ծանուցագիր են ստացել, այն օրից, երբ դաշնային օրենքի համաձայն նման ծանուցագիրը համարվում է հանձնված, արգելվում է ՌԴ-ից ելքը։
Պետդումայում առաջիկայում կքննարկվի միգրացիոն օրենսդրության նոր խստացումներ: Մասնագետների գնահատմամբ՝ այս խստացումները ուղիղ ազդեցություն են ունենալու մեր միգրացիոն հոսքերի վրա: Ավելին, Ռուսաստանի միգրացիոն ֆեդերալ ծառայության տվյալներով՝ անցած տարի մոտ 15 տոկոսով նվազել է այդ երկիր մեկնող հայաստանցի աշխատանքային միգրանտների թիվը:
«Հայկական կարիտաս» ՀԿ միգրացիոն ծրագրի փորձագետ Տաթևիկ Բեժանյանը
«Առաջին լրատվական»-ի հետ զրույցում նշեց, որ Ռուսաստանում միգրացիոն օրենսդրության նոր խստացումներ են սպասվում: Նրա խոսքով՝ պետական դումայում կա բավականին մեծ փաթեթ, որը մի քանի ամիս առաջ միգրացիոն հարցերի գերատեսչության ղեկավարը ներկայացրեց: Դա բավականին մեծ փաթեթ է, այդ թվում, ID քարտերի ներդրում և այլն: Եթե այդ փաթեթը հունիսին ընդունվեց, հունվարին կմտնի ուժի մեջ, և, ըստ Բեժանյանի, հաստատ շատ մեծ խստացումներ կլինեն, որոնք ուղղակի կհասցնեն նրան, որ այնտեղ անգամ օրինական կարգավիճակով մնալը դառնա գրեթե անհնար:
«Օրինակ՝ ուզում են մտցնել թափուր աշխատատեղերի և աշխատանք։ փնտրողների ռեեստրներ, որ եթե դու գրանցված չես այդ ռեեստրում որպես գործազուրկ կամ աշխատանք փնտրող, դու չես կարող այնտեղ աշխատել: Այսինքն՝ վեր կենալ, գնալ գործ գտնել չես կարող: Դու, հնարավոր է, չկարողանաս աշխատանք փոխել, եթե այնտեղ այլ մասնագիտություն ևս գրած չլինես: Հիմա եթե գրված է, որ յուրաքանչյուր 180 օրվա մեջ 90 օր կարող ես մնալ, նոր նախագծում գրված է, որ 365 օրվա մեջ են օտարկերկրացիները կարողանալու 90 օր գումարային մնալ: Այսինքն շատը մեծ խստացումներ են նախատեսվում: Հիմա կընդունվի, թե չի ընդունվի, չեմ կարող ասել: Եթե ընդունվեց, հունվարի 1-ից շատ մեծ խստացումներ ենք ունենալու, ինչը բնականաբար, կունենա իր հետևանքները: Ռուսաստանի միգրացիոն օրենսդրության յուրաքանչյուր խստացում ուղիղ ազդեցություն ունի մեր միգրացիոն հոսքերի վրա»,-հավելեց Բեժանյանը:
