Աշխարհի գործող չեմպիոն, Եվրոպայի կրկնակի չեմպիոն, oլիմպիական խաղերի բրոնզե մեդալակիր Արթուր Դավթյանը հաղթող ոսկե մեդալ նվաճեց նաև Եգիպտոսի մայրաքաղաք Կահիրեում անցկացվող առանձին գործիքների աշխարհի գավաթի խաղարկության չորրորդ փուլում: Դավթյանը, հանդես գալով հենացատկի եզրափակչում վաստակեց 15․166 միավոր զբաղեցնելով առաջին հորիզոնականը: Հայ մարմնամարզիկը, մասնակցելով աշխարհի գավաթների չորս փուլերից երեքին, երկրորդ տարին անընդմեջ կարողացավ նվաճել նաև բացարձակ հաղթողի կոչումը: Ավելի վաղ աշխարհի գավաթի խաղարկության չորրորդ փուլում Հայաստանի ևս երեք ներկայացուցիչներ դարձել էին մեդալակիրներ:Երիտասարդ Գագիկ Խաչիկյանը, հանդես գալով նժույգթափեր վարժության եզրափակչում, հավաքել էր 14.733 միավոր և դարձել արծաթե մեդալակիր, իսկ Եվրոպայի կրկնակի չեմպիոն Հարություն Մերդինյանը 14.566 միավորով եզրափակել էր լավագույն եռյակը՝ արժանանալով բրոնզե մեդալի։
Աշխարհի գավաթի խաղարկության բրոնզե մեդալը նվաճել էր նաև Արթուր Ավետիսյանը: Օղակների վարժության եզրափակչում նա 14,666 միավոր էր հավաքել և զբաղեցրել երրորդ հորիզոնականը: Այս վարժության եզրափակչում հանդես էր եկել նաև Արթուր Դավթյանը՝ ցույց տալով 7-րդ արդյունքը: Նշենք, որ աշխարհի գավաթի խաղարկությունները վարկանիշային են աշնանը Բելգիայում կայանալիք աշխարհի առաջնության համար, որտեղ մարզիկները պայքարելու են Փարիզի 2024 թվականի Օլիմպիական խաղերի ուղեգրերի համար: Ինչևէ, ընդամենը երկու շաբաթ առաջ մեր հավաքականի առաջատար Արթուր Դավթյանը Թուրքիայի Անթալիա քաղաքում մասնակցելով Եվրոպայի առաջնությանը ևս փայլուն արդյունք էր գրանցել՝ հռչակվելով չեմպիոն։ Թուրքիայում Դավթյանը հենացակտում վաստակել էր 15․033 միավոր։ Փաստորեն, Եվրոպայի առաջնությունից հետո մեր մարմնամարզիկը գերազանցել է իր իսկ ցուցանիշը։ Նման մակարդակի մրցաշարերում սա կարելի համարել ֆանտաստիկ վերելք։ Հիշեցնենք, որ անցյալ տարի Հայաստանի սպորտային մարմնամարզության պատմության մեջ առաջին անգամ աշխարհի բացարձակ գավաթակիրներ էին դարձել Արթուր Դավթյանը և Վահագն Դավթյանը: Ընդ որում աշխարհի գավաթի փուլերից վերջինը տեղի էր ունեցել Բաքվում, որին մեր հավաքականը հասկանալի պատճառով չէր մասնակցել։ Մասնակցության պարագայում մերոնց արդյունքները անհավանական բարձր կլինեին։ Ի դեպ, մեր մարզիկների մեդալներն ու մրցանակները Բաքվից գնացքով ուղարկվել էին Երևան։ Փուլերից մեկը բաց թողնելով աշխարհի բարցարձակ գավաթակիր դառնալն ընդունենք, որ ևս փայլուն արդյունք էր։
Ինչևէ այս տարվա ապրիլի սկզբին տպավորիչ արդյունքում աչքի ընկան մեր երիրտասարդ մարմնամարզիկները։ Մասնավորապես, մեր Հայաստանի երիտասարդական հավաքականը Թուրքիայում մասնակցել էր աշխարհի առաջնությանը և նվաճել 2 ոսկե ու 1 արծաթե մեդալ: Թիմային հաշվարկում Հայաստանի հավաքականը զբաղեցրել է 4-րդ հորիզոնականը: Հայաստանի հավաքականի կազմում աշխարհի երիտասարդական առաջնության կրկնակի հաղթող էր դարձել Համլետ Մանուկյանը՝ նժույգթափերի և օղակների վարժությունում: Նժույգթափերի վարժության եզրափակչում Համլետ Մանուկյանը հավաքել էր 14.633 միավոր և զբաղեցրել առաջին հորիզոնականը: Այս վարժության արդյունքներով արծաթե մեդալին արժանացել էր Հայաստանի մյուս ներկայացուցիչ Մամիկոն Խաչատրյանը՝ 14.100 միավորով:
Մանուկյանն առաջին հորիզոնականն էր զբաղեցրել նաև օղակների վարժությունում՝ եզրափակչում հավաքելով 13.633 միավոր: Վերջին շրջանում մեր մարմնամարզիկների գրանցած արդյունքները վկայում են, որ հայկական մարմնամարզությունը շարունակում է մնալ բարձունքում։ Ավելի ստույգ Հայաստանն ունի նաև ուժեղ երիտասարդական հավաքական, որի ներկայացուցիչները մոտ ապագայում ոսկե հավակնություններ կունենան մեծ մրցաշարերում։
