Քննարկվել է «Զենքի շրջանառության կարգավորման մասին» օրենքում և կից օրենքներում փոփոխություն և լրացում կատարելու մասին նախագծերի փաթեթը։ Առաջարկվեց «Զենքի շրջանառության կարգավորման մասին» օրենքի՝ որպես ուժի մեջ մտնելու ժամկետ սահմանել հուլիսի մեկը, քանի որ օրենքից բխող մոտ երեսուն ենթաօրենսդրական ակտեր դեռ պետք է ընդունվեն կառավարության կողմից։ ՆԳ փոխնախարար Արփինե Սարգսյանը Պաշտպանության և անվտանգության հարցերի մշտական հանձնաժողովի նիստին նշեց, որ հաշվի առնելով հանձնաժողովի նախագահ պարոն Քոչարյանի, հանձնաժողովի անդամներ Արմեն Խաչատրյանի և Վիլեն Գաբրիելյանի առաջարկները՝ հուլիսի 1-ը փոխել են հունիսի 1։ Նախագծի հեղինակներից Վիլեն Գաբրիելյանը նշել է, որ Անդրանիկ Քոչարյանը ներքին գործերի նախարարին է դիմելու՝ հասկանալու, թե խնդիրը որտեղ է եղել, որպեսզի գործընթացները չտապալվեն քավության նոխազներով։ Այս փոփոխությամբ կարգավորվում է ՀՀ-ում զենքի ռազմամթերքի շրջանառությունը, այն նպաստում է որսորդության, սիրողական և սպորտային հրաձգության, ինչպես նաև ռազմամարզության զարգացմանը․ ներդրվում է զենքի հետ վարվելու մշակույթը, որն ուղղված կլինի քաղաքացիների մարտունակության բարձրացմանը: «Առաջին լրատվական»-ը թեմայի շուրջ զրուցել է «Խաղաղության երկխոսություն» ՀԿ ղեկավար, իրավապաշտպան Էդգար Խաչատրյանի հետ:
Էդգար Խաչատրյանը «Զենքի շրջանառության կարգավորման մասին» օրենքի մասով որոշակի վերապահում ունի․ «Զենքի շարժը Հայաստանում վերահսկելը շատ դժվար է լինելու: Պետության համար դժվար է վերահսկել՝ ինչ է լինելու տրամադրված զենքի հետ: Երբ սահմանամերձ բնակավայրերի անվտանգությունը, թողնում ենք բնակիչների վրա , դա կարող է հանգեցնել էսկալացիայի: Պետությունը հասարակությանը պատրաստե՞լ է զենք ունենալուն, սա է ամենակարևորը: ՆԱՏՕ-ի ստանդարտներով պատրաստված բանակի դեմ փորձում ենք հակադրել մեր քաղաքացիներին, որոնք հրազենի հետ վարվելու դասընթաց չեն անցել: Ֆիլմի նման պատկերացում է, թե սահմանամերձի բնակիչները պատուհանից էլ կարող են ինքնապաշտպանվել»:
