Ադրբեջանական Trend լրատվական գործակալության փոխանցմամբ՝ ԱՄՆ-ի աջակցությամբ այսօր Թբիլիսիում տեղի է ունենալու միջուկային զենքի բաղադրատարրերի մաքսանենգության դեմ պայքարի հարցերին նվիրված կոնֆերանս։ Այս մասին հայտարարել է Վրաստանում ԱՄՆ դեսպանատունը։
Կոնֆերանսին մասնակցելու են նաև Վրաստանում ԱՄՆ փոխդեսպան Բրիջիտ Բրինկը և Վրաստանի ԱԳՆ-ի՝ եվրաատլանտյան կառույցներին ինտեգրման գծով դեպարտամենտի ղեկավար Նիկոլոզ Ռտվելիաշվիլին։
Կոնֆերանսի ընթացքում քննարկվելու է միջուկային մաքսանենգության դեմ համատեղ պայքարին առնչվող՝ Վրաստանի ու ԱՄՆ-ի միջև կնքված փաստաթուղթը։ Կողմերը սպառիչ տեղեկատվություն են ստանալու տվյալ փաստաթղթում շարադրված հնարավորությունների և տվյալ ուղղությամբ գործնական ծրագրերի իրականացման մասին։
ԱՄՆ դեսպանատան տվյալներով՝ 5 նախագծերին, իրենցից բացի, արդեն համաձայնել են ֆինանսապես աջակցել Շվեդիան և Մեծ Բրիտանիան։
Հիշեցնենք, որ դեռևս նախորդ տարվա ապրիլին Վրաստանի նախագահ Միխեիլ Սաակաշվիլին հայտարարել էր, որ Վրաստանում ուրանի վաճառքով զբաղվելու համար կան ձերբակալվածներ։ Նոյեմբերի սկզբին հայտնի դարձավ, որ ձերբակալվածները Հայաստանի քաղաքացիներ Սմբատ Տոնոյանն ու Հրանտ Օհանյանն էին, ովքեր Հայաստանից գնացքով Վրաստան էին տարել մինչ 89.4 տոկոս հարստացված 18 գրամ ուրան, որն արդեն պիտանի էր միջուկային զենքի արտադրության համար։