Տասնյակ հազարավոր մարդիկ դուրս են եկել Թել Ավիվի և Իսրայելի այլ քաղաքների փողոցներ՝ ընդդեմ կառավարության նախաձեռնած դատական բարեփոխումների։ Տեղեկությունը տարածում է «Ռոյթերս» գործակալությունը։
Բարեփոխման ընդդիմախոսները պնդում են, որ օրենսդրական փոփոխությունները կվնասեն ժողովրդավարությանը և կթուլացնեն իշխանության վերահսկողությունը։ Բարեփոխման դեմ բողոքի ակցիաներ են տեղի ունենում արդեն 15 շաբաթ։
Իսրայելի վարչապետը մարտի վերջին հետաձգել էր դատական վիճահարույց բարեփոխումների քննարկումը մինչև մայիսին նշանակված խորհրդարանական հաջորդ նիստը։ Բենյամին Նեթանյահուի խոսքով՝ կառավարությունը որոշել է հետաձգել բարեփոխումները՝ ավելի լայն կոնսենսուսի հասնելու ցանկության պատճառով։
Նախաձեռնված բարեփոխումը, որը փետրվարին առաջին ընթերցմամբ ընդունվել է Քնեսեթի կողմից, սահմանափակում է Գերագույն դատարանի լիազորությունները՝ կասեցնելու կառավարության ընդունած օրենքները։ Այն նաև բարձրացնում է կառավարության հեղինակությունը դատավորների ընտրության գործընթացում։
