Ուկրաինայի նախագահ Վլադիմիր Զելենսկու խոսքով՝ Զատիկին նախորդող շաբաթվա ոչ մի ժամ առանց ռուսական տեռորի չի անցել։
Իր ամենօրյա ուղերձում Ուկրաինայի նախագահը խոսել է Սլավյանսկի վրա ռուսական ուժերի հարձակման մասին և նշել, որ չար պետության դեմ հաղթանակը Ուկրաինայի պարտավորությունն է մարդկության առաջ։
«Գլխավորը օկուպանտների մշտական ոչնչացումն է, նրանց նյութատեխնիկական ապահովման եւ օկուպացված տարածքում ցանկացած ներուժի ոչնչացումը։ Սա մեր ակտիվ քայլերի նախապատրաստությունն է, սա հակագրոհային աշխատանք է։ Ես շնորհակալ եմ բոլոր այն զինվորներին, ովքեր ապահովում են դա, ովքեր հիշում են, որ Ռուսաստանի յուրաքանչյուր հարձակման համար մեր քաղաքների և գյուղերի, մեր դիրքերի վրա, ուկրաինացիների յուրաքանչյուր սպանության համար օկուպանտը պետք է կրի ամենազգալի կորուստները»,- ասել է Վլադիմիր Զելենսկին։
Զելենսկին խոսել է նաև ՆԱՏՕ-ին Ուկրաինայի ինտեգրման մասին։
«Ակնհայտ է, որ Ուկրաինայի տեղը ՆԱՏՕ-ում է, դա օրինական տեղ է։ Մենք չենք ցանկանում, որ հնացած պատրանքները, որոնք խանգարել են մեզ միանալ դաշինքին, շարունակեն վատնել Ուկրաինայի և նրա գործընկերների ժամանակը։ Մենք աշխատում ենք համապատասխան քայլերի վրա»,- ասել է Զելենսկին։
