Վաշինգտոնում կայացած արգասաբեր հանդիպումների արդյունքում Ուկրաինան իր գործընկերներից ստացել է լրացուցիչ 5 միլիարդ դոլարի ֆինանսավորման խոստում,- այս մասին լրատվամիջոցներին ասել է Ուկրաինայի վարչապետ Դենիս Շմիգալը։
Ուկրաինան օգնության նոր խոստումներ է ստացել Շվեյցարիայից, Դանիայից, Իսպանիայից, Իռլանդիայից, Ճապոնիայից, Լատվիայից և Լիտվայից։ Բացի այդ, ուկրաինական կողմը պայմանավորվածություն է ձեռք բերել ամերիկյան «Բոինգ» ընկերության հետ՝ ուկրաինական ընկերություններին 200 մլն դոլար պարտքը չեղարկելու վերաբերյալ։
Ուկրաինայի վարչապետի խոսքով՝ բյուջեի դեֆիցիտը փակելու համար այս տարի Ուկրաինային անհրաժեշտ է մոտ 14 միլիարդ դոլարի ֆինանսավորում։ Ինչպես նշել է նա, ԱՄՆ-ն այդ նպատակով կհատկացնի 2,3 միլիարդ դոլար, իսկ Եվրամիությունը՝ մեկ միլիարդ եվրո։
Պենտագոնի գաղտնի փաստաթղթերի արտահոսքի վերաբերյալ Ուկրաինայի վարչապետն ասել է, որ Ուկրաինան միասնական է մնում ԱՄՆ-ի և այլ գործընկերների հետ։
«Լլոյդ Օսթինի հետ զրույցի ընթացքում մենք քննարկել ենք Ուկրաինային աջակցելու հարցը ողջ այս ընթացքում։ Այժմ մենք պատրաստվում ենք մեր հակագրոհին։ Մենք բացարձակապես միասնական ենք ամերիկյան և այլ միջազգային գործընկերների հետ հակահարձակման նախապատրաստման գործընթացում։ Մենք վստահ ենք, որ հաղթելու ենք այս պատերազմում։ Մենք կազատագրենք տարածքները»,- ասել է Շմիգալը Ամերիկայի Միացյալ Նահանգների պաշտպանության նախարարի հետ հանդիպումից հետո։
