Կիպրոսի դեմ ընկերական խաղում Հայաստանի ազգային հավաքականի կազմում դուբլի հեղինակ դրաձավ «Բավարիայի» երկրորդ թիմի հարձկավող 19-ամյա Հրանտ-Լեոն Ռանոսը։ Վերջինս առաջին անգամ կրեց մեր ազգային թիմի մարզաշապիկը։ Այս տարիքում ազգային թիմի կազմում նման նորամուտի մասին միայն երազել կարելի է։ Ռանոսը ցուցադրեց փայլուն խաղ արժանանալով երկրպագուի մեծ համակրանքին։ «Ուրախ եմ, երկու գոլերիս համար, սակայն ցավալի է, որ չհաղթեցինք: Հրաշալի թիմ ունենք` բարի մարդկանցով: Վայելել եմ թիմի հետ մարզումները»,- լրագրողների հետ զրույցում ասել էր Ռանոսը։ Այն, որ Հայաստանի ազգային հավաքականում հայտնվել է տաղանդավոր հարձակվող դա լուրջ դրական տեղաշարժ կարելի է համարել, բայց․․․։ Լավ ֆուտբոլիստ ձեռք բերելը մի խնդիր է, իսկ այդ ֆուտբոլիստին պահպանելն ու նրա առաջխաղացումն ապահովելը միանգամայն այլ խնդիր։
«Մեծ խնդրանք ունեմ, շատ մի գովեք Ռանոսին, գիտեք, ում երակներով հայկական արյուն է հոսում, նրանք հետո կորչում են և մենք չենք կարողանում գտնել նրանց; Նա կատարեց իր աշխատանքը, ինձ հարցնում էին նրա մասին, ցույց տալիս նրա խաղը և ես միանգամից տվեցի իմ համաձայնությունը: Ինքներդ տեսաք, տղան մտավ դաշտ ու երկու գոլ խփեց, սակայն, խնդրում եմ, շատ մի գովեք նրան»,- Կիպրոսի դեմ խաղից հետո ասել էր Հայաստանի հավաքականի գլխավոր մարզիչ Ալեքսանդր Պետրակովը։ Վերջինս դիտարկման հետ չհամաձայնվել ուղղակի չի կարելի։ Տարիների ընթացքում Հայաստանի ազգային թիմում հայտնվել են բազմաթիվ երիտասարդներ և շատերին թվացել է, որ ի հայտ են եկել նոր ֆուտբոլային աստղեր։ Ազգային թիմում հայտնվելու և աստղ որակումը լսելու հետևանքով սակայն բազմաթիվ ֆուտբոլիստներ ուղղակի մարել են։ Այո, Ռանոսը խաղում է «Բավարիայում» և մարզվում է պրոֆեսիոնալ մթնոլորտում, բայց․․․։ Մարդկային գործոնն ամեն դեպքում կարող է խանգարել մարզիկների վարակլեվ աստղային հիվանդությամբ և կործանել կարիերան։ Հարկ ենք համարում ընդգծել, որ Ռանոսը երկու գոլ է խփել կարգով թույլ հավաքականի։ Թուրքիայի դեմ նորամուտը նշելու պարագայում հնարավոր է ունենայինք միանգամայն այլ պատկեր։ «Ծնվել եմ Հանովերի շրջանի Գերդեն քաղաքում: Ֆուտբոլով սկսել եմ զբաղվել հորս շնորհիվ: Նա հանդես էր գալիս տեղի փոքր ակումբներից մեկում: Երբեմն գնում էի նրա մարզումներին, նայում էի, թե ինչպես է խաղում։ Այդպես սկսեցի սիրել ֆուտբոլը։Մեկ տարի հանդես եմ եկել Դորտմունդի «Բորուսիայում», այնուհետեւ ինձ առաջարկով դիմեցին Մյունխենի «Բավարիայից»:
Մեկ շաբաթով գնացի այնտեղ, ծանոթացա ամեն ինչին, հասկացա՝ ինչպես է աշխատում համակարգը։ Շատ հավանեցի, պայմանագիր ստորագրեցի եւ տեղափոխվեցի այնտեղ։ Այժմ հանդես եմ գալիս Ռեգիոնալ լիգայում, որտեղ խաղային ինտենսիվությունը շատ բարձր է, մակարդակը բավականին լավն է, հեշտ է զարգացնել խաղային որակները:Հայաստանի հավաքականում խաղալու որոշումը հեշտ ընդունեցի: Ես սիրում եմ այս երկիրը եւ շատ հպարտ եմ, որ հայ եմ:Հավաքականում ամենաշատը շփվում եմ Գերմանիայից եկած խաղացողների՝ Սարգիս Ադամյանի եւ Երջանիկ Ղուբասարյանի հետ: Սաքոն ինձ խորհուրդ է տվել չլարվել եւ փորձել խաղալ իմ ֆուտբոլը: Ես շատ երիտասարդ եմ եւ կանեմ հնարավոր ամեն ինչ թիմին օգնելու համար։ Ալեքսանդր Պետրակովը շատ է սիրում ֆուտբոլը, նա մեծ ցանկություն ունի այստեղ ինչ որ բան փոխել»,- Հայաստանի հավաքականին միանալուց հետո ՀՖՖ-ին տված հարցազրույցում ասել էր Ռանոսը։
Վերջինս արդեն իսկ օգնել է մեր հավաքականին իր նվիրվածության և խաղային որակների հաշվին։ Լիահույս ենք, որ առաջիկա հանդիպումներում Ռանոսը կզարգացնի հաջողությունը։ Այս հարցում սակայն միանգամայն ճիշտ կլնի վստահել Ալեքսանդր Պետրակովին։ Չմոռանանք, որ այս մասնագետի գլխավորթյամբ Ուկրաինայի ազգային հավաքականը դարձել է աշխարհի չեմպիոն։ Այսինքն Պետրակովը երիտասարդներին իրական պրոֆեսիոնալ դարձնելու մեծ փորձ ունի։ Հրանտ-Լեոն Ռանոսը լավ որակներ ունեցող հեռանկարային ֆուտբոլիստ է, բայց աստղ չէ։
