Ռուսաստանը ցանկանում է Մոլդովան օգտագործել Ուկրաինայի դեմ այնպես, ինչպես օգտագործում է Բելառուսը, հայտարարել է Մոլդովայի նախագահ Մայա Սանդուն։
Սանդուի խոսքով՝ Ռուսաստանը փորձում է խարխլել ու տապալել Մոլդովայի իշխանությունը, իսկ երկրի իշխանությունները նման գործողությունների ապացույցներ ունեն։
Մոլդովայի նախագահը հիշեցրել է նաև Ռուսաստանի նախագահ Վլադիմիր Պուտինի վերջին հայտարարությունը Բելառուսի տարածքում տակտիկական միջուկային զենքի տեղակայման մասին։
«Պարզ է, որ Ռուսաստանը փորձում է Քիշնեւում ռուսամետ կառավարություն տեղադրել՝ Մոլդովան Ուկրաինայի դեմ օգտագործելու համար, ինչպես դա տեղի է ունենում, օրինակ, Բելառուսի դեպքում։ Սա հենց այն է, ինչ ուզում է անել Ռուսաստանը Մոլդովայի պարագայում, չնայած այսօր Մոլդովան ունի իր քաղաքացիների կողմից ընտրված անկախ իշխանություն, որն աշխատում է ի շահ քաղաքացիների և Մոլդովայի։ Ուստի այն չի կարող օգտագործվել այնպես, ինչպես ռուսամետ ղեկավարությունը»,- ասել է Մայա Սանդուն։
