«Ռոսսելխոզնադզորը» տարածել է հայտարարություն, որն այն մասին է, թե կարող է արգելվել Հայաստանից կաթնամթերքի մուտքը ռուսական շուկա, քանի որ այն չի համապատասխանում պահանջվող ստանդարտներին: «Հայտնաբերված խախտումների բնույթը վկայում է նաև անասնաբուժական պետական ծառայության կողմից կաթնամթերքի վերամշակման ձեռնարկությունների գործունեության նկատմամբ պատշաճ վերահսկողության բացակայության մասին, ինչը բարձրացնում է Ռուսաստան անորակ և ոչ անվտանգ արտադրանքի ներմուծման վտանգը։ Այդ իսկ պատճառով «Ռոսսելխոզնադզորը» դիմել է Հայաստանի անասնաբուժական ծառայությանը՝ խնդրանքով կասեցնել երկու ստուգված ձեռնարկություններից Ռուսաստան կաթնամթերքի սերտիֆիկացումը։ «Ռոսսելխոզնադզորը» տեղեկացրել է Հայաստանի Հանրապետության սննդամթերքի անվտանգության տեսչական մարմնին ԵԱՏՄ-ում գործող անասնաբուժական օրենսդրության խախտումների անթույլատրելիության մասին։ Թեմայի շուրջ «Առաջին լրատվական»-ը զրուցել է բիզնես-փորձագետ Նարեկ Ալեքսանյանի հետ:
Ալեքսանյանի խոսքով՝ «Ռոսսելխոզնադզորի» հայտարարությունը պետք է դիտարկել տնտեսական դիվանագիտության ճգնաժամ․ «Չկա սահմանափակում, կա սահմանափակման վտանգ:Այսուհետ հայկական կաթնամթերքին գործարար աշխարհում կպնելու է պարսկական հումքի պիտակը: «Ռոսսելխոզնադզորը» հարց է դրել, որը մեր մոտ առաջացրել է տագնապ․ կաթնամթերքը ունի մուլտիպլիկացիոն էֆեկտ: Եթե ունենայինք տնտեսական դիվանագիտություն, «Ռոսսելխոզնադզորի» բարձրացրած հարցը տագնապ չէր առաջացնի»: