Ադրբեջանի ՊՆ-ն հայտարարություն է տարածել Լաչինի միջանցքում՝ Հայաստանի հետ սահմանին մերձ հատվածում նոր դիրքեր և բարձրունքներ վերահսկելու մասին: Հայաստանի վարչապետը այդ հաղորդագրությունը գնահատել է «բլոկբաստեր», որը մտացածին է այն առումով, որ տեղի է ունեցել ընդամենը Լաչինի միջանցքով երթուղու՝ վաղօրոք պայմանավորված փոփոխություն: Դրա մասին հաղորդագրություն է տարածել նաև Արցախի տեղեկատվական շտաբը: Ինչպես հայտնի է, նոր երթուղու կառուցման մասին արձանագրված է նոյեմբերի 9-ի եռակողմ հայտարարության մեջ: Ըստ այդ հայտարարության, երթուղին պետք է կառուցվեր եռամյա ժամկետում, սակայն իրադարձությունները զարգացան ավելի արագ և 2022-ի օգոստոսին տեղի ունեցավ երթուղու մասնակի փոփոխություն՝ Աղավնո գյուղի հատվածում:
Այսօր տեղի ունեցածը, համենայն դեպս դատելով Հայաստանի վարչապետի հայտարարությունից և Արցախի տեղեկատվական շտաբի տարածած հաղորդագրությունից՝ շարունակությունն է, այսպես ասած Հայաստանից դեպի Արցախ՝ Լաչինի միջանցքով նոր երթուղու ամբողջացումը: Այդ տպավորությունն է համենայն դեպս առայժմ, քանի դեռ չեն հայտնվել հավելյալ տեղեկություններ, իհարկե հավաստի, որոնք կարող են ի ցույց դնել այլ պատկեր: Միևնույն ժամանակ, համաձայն նոյեմբերի 9-ի եռակողմ հայտարարության մեջ ամրագրված՝ Լաչինի միջանցքով նոր երթուղու վերաբերյալ պայմանավորվածության, այն պետք է վերաբերեր նաև Շուշիի հատվածը շրջանցելուն, երբ կկառուցվի նոր ճանապարհային մուտք դեպի Ստեփանակերտ, որը կշրջանցի Շուշին: Այստեղ կա հարց, որ հնչում է դեռևս 2022-ի օգոստոսից, և կարծես թե չունի հանգամանալից պատասխան մինչև այսօր. ինչ վիճակում է այդ ճանապարհի հարցը, կառուցման հեռանկարը: Ի վերջո, դա կարծես թե շրջանցելու է նաև այն հատվածը, որն այսօր արգելափակել է Ալիևը իր «էկոլոգներով»: Ինչ խոսք, միամիտ կլինի կարծել, թե՝ նոր ճանապարհով հնարավոր է «բացել» արգելափակումը և Ալիևը գնալով այդ քայլին, այսպես ասած՝ չի մտածել հնարավոր շրջանցիկ տարբերակի մասին: Մյուս կողմից սակայն, եթե պայմանավորվածությունները իրականացվում են Լաչինի միջանցքով նոր երթուղու «մի ծայրի» վերաբերյալ, ինչու՞ նույն կերպ դրանք առաջ չեն ընթանում «մյուս ծայրի» առնչությամբ:
