Իսրայելը չի համապատասխանում առանց վիզայի ԱՄՆ մուտք ունենալու պահանջներին: Այս մասին հայտարարել է ԱՄՆ պետքարտուղարության գլխավոր փոխխոսնակ Վեդանտ Պատելը: Նրա հայտարարությունը հակասել է Իսրայելի վարչապետ Բենյամին Նեթանյահուի այն պնդմանը, թե Իսրայելի քաղաքացիները կկարողանան ԱՄՆ անայցագիր մուտքի հնարավորություն ստանալ:
«Իսրայելի ապագա ընդգրկումը վիզային ռեժիմի չեղարկման ծրագրին փոխշահավետ է ԱՄՆ-ի և Իսրայելի համար: Եվ մենք շարունակում ենք աշխատել այս հարցի շուրջ։ Մենք շարունակում ենք աշխատել մեր իսրայելցի գործընկերների հետ՝ բոլոր պահանջները կատարելու ուղղությամբ։ Սակայն այս պահին Իսրայելը չի բավարարում բոլոր պահանջները: Եվ վիզաների չեղարկման ծրագրին համապատասխանելու համար Իսրայելը դեռևս զգալի աշխատանք ունի կատարելու կարճ ժամանակում, որպեսզի բավարարի այդ բոլոր պահանջները մինչև ֆինանսական տարվա ավարտը, որը սեպտեմբերի 30-ին է», – նշել է պետքարտուղարության ներկայացուցիչը:
Պատելը հավելել է, որ Իսրայելը, ինչպես ծրագրում ընդգրկված բոլոր երկրները, պետք է փոխադարձաբար ապահովի ԱՄՆ քաղաքացիների ազատ մուտքն ու տեղաշարժն իր տարածքով՝ անկախ ազգային պատկանելությունից և կրոնից:
Ինչպես ավելի վաղ հայտնել էինք, Իսրայելի վարչապետ Բենյամին Նեթանյահուն հայտնել էր, որ «իսրայելցիներին Միացյալ Նահանգներ մուտքի վիզա ստանալու անհրաժեշտությունից ազատելու համար բոլոր օրենսդրական պահանջները հաջողությամբ կատարվել են», և մինչև 2023 թ.-ի սեպտեմբերը Իսրայելը կմիանա «այն երկրների ցանկին, որոնց քաղաքացիներին վիզա անհրաժեշտ չէ ԱՄՆ մուտք գործելու համար»։
