Այսօր ժամը 19-ին Վագզեն Սարգսյանի անվան «Հանրապետական» մարզադաշտում Հայաստանի ազգային հավաքականը ստուգողական հանդիպում կանցկացնի Կիպրոսի հետ։ Այո, մրցավեճն իր նշանակությամբ պաշտոնական չէ, բայց․․․։ Մեր ֆուտբոլիստներին ուղղակի անհրաժեշտ է հաղթանակ, հավաքականի գլխավոր մարզիչ Պետկարովին անհրաժեշտ է հաղթանակ։ Երկրպագուին անհրաժեշտ է հաղթանակ, և վերջապես, Հայաստանին անհրաժեշտ է հաղթանակ։ «Ես գոհ մնացի Թուրքիայի դեմ խաղում տղաների խաղային կարգապահությունից: Մարզումների ընթացքում տղաները ինձ ուշադիր լսում էին: Նրանց հետ ամբողջ մարզչական կազմն էր աշխատում: Առաջին խաղի համար վատ չէր: Կշարունակենք շարժվել առաջ: Այս պահի համար տղաների վերաբերմունքն իրենց աշխատանքին՝ ֆուտբոլին, ինձ դուր է գալիս: Տեսնենք՝ վաղն ինչպես կլինի: Ես էլ եմ մտահոգվում վաղվա խաղից առաջ: Ինձ դուր է գալիս թիմի հետ շփվելը: Դեռ նոր եմ ծանոթանում բոլորի հետ: Լավ տղաներ են: Անկեղծ»,- երեկ լրագրողների հետ հանդիպմանն ասաց Ալեքսանդր Պետրակովը: Վերջինիս շեշտադրումներից պարզ է դառնում, որ այսօրվա օրակարգում համոզիչ հաղթանակն է։ «Թուրքիայից կրած պարտությունն իր հետքը թողեց, հատկապես ինձ վրա:
Ես այդքան էլ շատ չեմ պարտվել իմ կյանքում: Դուք չեք քննադատում, ասում եք, որ քիչ թե շատ խաղ կար: Բայց ես նայում եմ ցուցատախտակին:, իսկ այնտեղ պարտություն է: Ես նայեցի խաղը, այնտեղ վիճելի դրվագ կար: Բայց մրցավարը ոչ VAR-ին դիմեց, ոչ 11-մետրանոց նշանակեց: Դա կարող էր ինչ-որ բան փոխել»,- նշել է ուկրաինացի մասնագետը։ Ինչևէ, Թուրքիայի դեմ խաղից հետո Լուկաս Սելարայանը, Նորբերտո Բրիասկո-Բալեկյանը և Էդգար Բաբայանը, համաձայն նախնական պայմանավորվածության, վերադարձել են իրենց ակումբներ և չեն մասնակցի Հայաստան – Կիպրոս հանդիպմանը Հավաքականի ճամբարը վնասվածքի պատճառով լքել է նաև Անդրե Չալըշըրը: Տարոն Ոսկանյանի վնասվածքը շատ լուրջ չէ: Ազգային հավաքականի կենտրոնական պաշտպանի մոտ ախտորոշվել է ձախ սրունք-թաթային հոդի և նրբոլոքի վնասվածք։ Բուժումն ու վերականգնումը կտևի մոտ 20 օր։ Փաստորեն, հիմնական կազմի միանգամից 5 ֆուտբոլիստներ չեն լինի այսօրվա խաղի հայտացուցակում։ Միևնույն ժամանակ «Բավարայի» երկրորդ թիմի հարձկավող Հրանտ-Լեոն Ռանոսը կարող է իր նորամուտը նշել Կիպրոսի հավաքականի դեմ խաղում: «Անկեղծ ասեմ՝ փոփոխություններ սպասվում են: Կան տղաներ, որոնք ուզում եմ խաղում տեսնել: Հայաստանի առաջնությունում խաղալը մի բան է, հավաքականում խաղալը՝ մի այլ բան: Հոգեբանության հարց է: Գեորգի Հարությունյանի հետ էլ երկար խոսել եմ: Նա շատ էր տանջվում. երիտասարդ է, երիտասարդական առաջնությունում է խաղում, ու Ազգային հավաքական, նման խաղ, Թուրքիայի դեմ: Բայց մենք զրուցեցինք խաղից առաջ, ու նրան հաջողվեց հաղթահարել հուզմունքը: Շատ եմ ուզում նոր տղաների տեսնել, հասկանալ՝ որքանով են պատրաստ այդպիսի խաղերի»,- խոսելով Կիպրոսի դեմ խաղի մասին նշել է Պետրակովը: Այո այսօր ազգային թիմում կտեսնենք նոր անուններ։ Պետրակովի աշխատանքի հիմնում նոր թիմ ստեղծեն է, որտեղ տոն տվողը պետք է լինեն երիտասարդները։
Կրկին նշենք, որ Թուրքիայի դեմ նվիրվածության և պայքարի ձգտումի առումով մեր ֆուտբոլիստները ուղղակի փայլեցին։ Փայլեցին նաև երկրպագուները, որոնք 90 րոպե առաջ մղեցին տղերքին։ Թե Պետրակովի, թե ֆուտբոլիստների և թե երկրպագուների գլխավոր խնդիրը պետք է լինի պահպանել այն էներգետիկան որն առկա էր մարտի 25-ին։
Ամենևին էլ կարևոր չէ մենք խաղում ենք Թուրքիայի, կամ այլ հավաքականի դեմ։ Մենք պետք է ձևավորենք ստադիոնը թնդեցնելու ավանդույթ։ Լիահույս ենք, որ այսօր «Հանրապետականը» լեցուն կլինի և մեր ֆուտբոլիստները դրական էներգետիկայի պակաս չեն ունենա։ Այո մենք չհաղթեցինք Թուրքիային, բայց ունենք իրական հնարավորություն հաղթելու այսօր։
