Բանակում բարեփոխումների տեմպը մտահոգությունների տեղիք է տալիս, բարեփոխումները պետք է անել վայրկյան շուտ, վարանելը շռայլություն է մեզ համար: «Առաջին լրատվական»-ի հետ զրույցում նշեց /«Խաղաղության երկխոսություն» հասարակական կազմակերպության ղեկավար, իրավապաշտպան Էդգար Խաչատրյանը:
Խաչատրյանը կարծում է, որ պաշտպանության նախարարի այցերը զորամասեր մակերևույթի վրա են․ պահի լուծումներով իրավիճակը չի շտկվի:
Իրավապաշտպանը նաև կարծում է,որ բանակի «փչանալը» երկար տարիների կոռուպցիայի, թալանի, արատավոր բարքերի հետևանք է․ «Եթե պետության ինստիտուտները խնդիր ունեն, չես կարող մի ոլորտը վերցնել ու բարեփոխել: Պետական ինստիտուտների կայացման համար մոտեցում պետք է մշակել: Վարչապետը նշում է բանակում խնդիրները, բայց այդ ուղղությամբ բավարար աշխատանքներ չի տարվում»:
Խաչատրյանը բանակում խորքային խնդիրների պատճառներից մեկը համարում է ՌԴ-ից կախվածությունը․ «Ռուսաստանից տարիներ շարունակ եղել է ազդակ, որ պետք է գործեք այս սահմաններում: Փորձ չի արվել, որ մեր սպայական անձնակազմը վերապատրաստվի ոչ թե ՌԴ-ում, այլ ՆԱՏՕ անդամ երկրներում»:
