«Առաջին լրատվական»-ի զրուցակիցն է ԱՀ նախագահի խորհրդական, Արցախի նախագահի հատուկ հանձնարարությունների գծով ներկայացուցիչ Դավիթ Բաբայանը։
-Պարոն Բաբայան, Արցախի դեմ ուղղված վերջին գործողությունների ֆոնին, այսօր Ադրբեջանը հանդիպման հերթական առաջարկն է արել։ Ի՞նչ դիտարկումներ կան սրա վերաբերյալ, պե՞տք է ընդունել առաջարկը, քննարկել իրավիճակը, թե՞ մերժել։
–Հայտարարության մեջ նշված է «Ղարաբաղի հասարակության ներկայացուցիչներ» ձևակերպումը, նույնիսկ համայնք էլ նշված չէ։ Անգամ այդ «համայնք» ձևակերպումը մեզ համար ընդունելի չէ, իսկ սա բոլորովին ամորֆ է։ Այս ամենը ցույց է տալիս, որ Բաքուն ընդունված, նորմալ՝ հավասարը-հավասարի բանակցությունների պատրաստ չէ։ Ինչ-որ տեղ մեզ փորձում է ծաղրել, նվաստացնել։ Նախևառաջ պետք է լինի համապատասխան ձևաչափ, ոչ միայն Արցախ-Ադրբեջան, այլ նաև այլ մասնակիցներ։ Ձևաչափը նշված է, ընդունվել է ԵԱՀԿ Մինսկի խմբի կողմից, ԵԱՀԿ-ի կողմից, Բուդապեշտի գագաթաժողովի…
Եթե ուզում են հանդիպել, մենք դեմ չենք նորմալ բանակցային գործընթաց սկսելուն, բայց այսպիսի առաջարկն իսկապես վիրավորանք է, ծաղրանք, ցույց է տալիս, որ Ադրբեջանը չի ուզում այս հակամարտությունը նորմալ ձևով կարգավորել։ Դրա համար էլ այսպիսի քայլեր է անում, դրան զուգահեռ սպանում մեր անմեղ քաղաքացիներին, իրականացնում է Արցախի շրջափակում ու պաշարում, չի կատարում միջազգային ատյանների որոշումները, ինչի՞ մասին է խոսքը։ Դեռ մի կողմ դնենք հասարակ անվտանգային խնդիրները, որ մարդկանց բռնեն, դատեն, ի՞նչ ենք անելու, սպասելու ենք մի քանի ամիս հետո Միջազգային դատարանը որոշում ընդունի, նրանք էլ դա շպրտեն չգիտեմ որտե՞ղ։
-Վերջին գործողություններն ինչի՞ հետ եք կապում։ Հնարավո՞ր է ուզում են դեռ չկառուցված այլընտրանքային ճանապարհի հնարավորությունն էլ փակել։
-Ուզում են Արցախը խեղդել։ Որևէ հատուկ հանգամանք չկա։ Հասկանում են, որ ժամանակն, ըստ երևույթին, աշխատում է իրենց դեմ, հնարավոր է տարածաշրջանում խորաթափանց փոփոխություններ լինեն ու քանի դեռ այս իրավիճակում ենք, թույլ ենք ՝ փորձում են ինչ-որ դիվիդենտներ շահել։
-Հիմա, այս իրավիճակի հետ կապված ռուս խաղաղապահների հետ կոմունիկացիներ կա՞ն, ինչ-որ բան արվու՞մ է։
-Տեսնում ենք, որ ռուս խաղաղապահները փորձում են ինչ-որ կերպ զսպել, բայց քանակն է քիչ՝ 1980 հոգի։ Դրա համար ենք անընդհատ ասում, որ պետք է քանակը շատանա, պետք է համապատասխան մանդատ ունենան, բայց ինչ-ինչ պատճառներով մարդիկ այլ հարցեր են փորձում լուծել, Արցախի արյան մեջ ձկներ են որսում։ Փոխանակ հասկանան՝ ինչ իրավիճակում ենք, աշխարհաքաղաքական խաղեր են տալիս։ Ցավալի է, որ դա անում են հայ հասարակության որոշ սեգմենտի ներկայացուցիչներ, դե ուրախացեք՝ Արցախն ավելի վատ վիճակում է։ Եթե որոշ մարդկանց գերնպատակը ռուսներին վատություն անելն է, արե՛ք, բայց դա մեր արյան գնով է, արեք ուրախացեք, ի՞նչ ասեմ։
-Կարծում եք իրենց չգործելու պատճառնը մանդատն ու քանա՞կն է։
-Իհարկե։ Ամեն տեղ կարո՞ղ են հասցնել։ Հարցեր են կան, չէ՞ բազմաթիվ։ Այո՛, մենք կոշտ արաձագանք ենք սպասում, բայց իերնք ո՞նց անեն, եթե մանդատ չունեն ու քանակն է քիչ։ Փոխանակ սրա մասին մտածենք, ասում ենք՝ սրանք բերեք, նրան բերեք, չի կարելի չէ՞։ Տեսնում ենք՝ ամեն օր ինչ են անում։
-Օրերս ամերիկյան կողմը լավատեսություն են հայտնել գործըթնացի առաջ գնալու հետ կապված։ Դուք նախադրյալներ տեսնու՞մ եք։
Պետք է իրենց հարցնել, հասկանալ՝ որտեղի՞ց դրական ակնկալիքներ։Դրական իրավիճակ է Ադրբեջանի համար, մեզ համար դրական բան ես չեմ տեսնում։
