Հայաստանի և Ադրբեջանի միջև հասունացող լարվածության մասին հրապարակումներ են հայտնվում չինական լրատվամիջոցներում, ինչը խոսում է այն մասին, որ Կովկասում աշխարհաքաղաքական պայքարի լարվածության աստիճանը բավականին բարձր է: Ռեգիոնալ էսկալացիայի հանգամանքը պայմանավորված է հենց այդ՝ աշխարհաքաղաքական դիմակայության ուժգնացման ազդեցությամբ, իսկ դրա վկայություններից մեկն այն է, որ Չինաստանի նախագահի Ռուսաստան կատարած պետական այցից հետո ՌԴ նախագահ Պուտինը հայտարարեց Բելառուսում տակտիկական միջուկային զենքի պահոցի շինարարությունն առաջիկա ամիսներին ավարտելու վերաբերյալ: Մի էական հայտարարություն էլ հնչեց Չինաստանից: Սի Ցզինպինի Մոսկվա այցից հետո հայտարարվեց, որ 2023 թվականին Պեկինում կանցկացվի Չինաստան-Կենտրոնական Ասիա Վեհաժողով, որն ըստ Չինաստանի ԱԳՆ-ի՝ կլինի տարվա դիվանագիտական կարևոր իրադարձություններից մեկը:
Կասկած չկա, որ Մոսկվայի հետ բարձր մակարդակի բանակցությանը քննարկվող առանցքային թեմաներից մեկը եղել է հենց կենտրոնասիական ռեգիոնի հարցը, այնտեղ ազդեցության ապահովման տեսանկյունից, հաշվի առնելով և այն, որ Արևմուտքն էլ իր հերթին ձեռնարկում է հակազդեցության քայլերը, կամ ազդեցության քայլեր Արևմուտքից և հակազդեցություն Մոսկվա-Չինաստան տանդեմից, թեև այդտեղ թերևս պետք է ներառել նաև Իրանը: Բոլորովին վերջերս Կենտրոնական Ասիա էր այցելել ԱՄՆ պետքարտուղարը, օրերս՝ Բրիտանիայի արտգործնախարարը, իսկ շաբաթներ առաջ Կենտրոնական Ասիայի նախկին ԽՍՀՄ հանրապետությունների առաջնորդներին Փարիզում ընդունում էր Ֆրանսիայի նախագահ Մակրոնը:
Այստեղ առանցքայինն այն է, որ կենտրոնասիական ռեգիոնում ազդեցության ու հակազդեցության այս դիմակայությունը անշեղորեն սպառնում է ավելացնել լարվածությունը Կովկասում, քանի որ պետք է արձանագրել՝ Կենտրոնական Ասիա տանող «առանցքային դարպասներից» մեկը Կովկասն է և Կովկասում ազդեցությունը էապես կանխորոշիչ կլինի Կենտրոնական Ասիայում դոմինանտության հարցում: Իսկ սա ռեգիոնալ կայունության վրա ճնշման աճի շոշափելի գործոն է, ինչի առկայության մասին էլ խոսում է այն, որ հնարավոր սկալացիայի թեման հայտնվում է նաև չինական մեդիայի ուշադրության կենտրոնում: Այս հանգամանքն իր հերթին Երևանից պահանջելու է ավելացնել կայունության ապահովմանն ու ռիսկերի կառավարելիությանը միտված բազմակողմ դիվանագիտության ջանքը:
