Ազգային ժողովը երկրորդ ընթերցմամբ և ամբողջությամբ ընդունեց «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ և փոփոխություններ կատարելու մասին նախագիծը: Այսպես, դատախազներին կվճարվի ամսական հավելում պաշտոնային դրույքաչափի 92 տոկոսի չափով:
Դատախազների վարձատրության ավելացման նման մոտեցման համար հիմք են հանդիսացել քրեական վարույթի ընթացքում դատախազների նկատմամբ առկա արտաքին ճնշումների անհամեմատ բարձր հավանականությունը, գերծանրաբեռնված և հանրային բարձր պատասխանատվություն ենթադրող դատախազներ, աշխատանքի բարձր որակավորում ունեցող մասնագետներ ներգրավելու համար գրավչությունն ապահովելու անհրաժեշտությունը:
Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը «Առաջին լրատվական»-ի հետ զրույցում նշեց, որ ընդհանրապես պաշտոնական դրույքաչափերի վերանայման անհրաժեշտություն կա, որովհետև պետական ծառայությունը պետք է գրավիչ լինի մասնագետների համար. «Իհարկե, պետական դրույքաչափը կամ աշխատավարձի չափը պետք է մրցակցի մասնավոր ոլորտում աշխատավարձերի հետ, միանշանակ է, որ նա պետք է ունենա մրցունակ աշխատավարձ, կամ առնվազն ապահովի իր պաշտոնից բխող գործառույթները պատշաճ կատարելու աշխատավարձի չափ։
Ուղղակի հարց է առաջանում՝ ինչու հավելավճար, ինչու միանգամից դրույքաչափը չփոխել: Շատ լավ հասկանալի է, որ եկամտահարկ վճարվում է դրույքաչափի դեպքում, միանգամից աշխատավարձի դրուքաչափն ավելացրեք։ Հավելավճար ասվածը բազմաթիվ հարցեր է առաջացնում»,-ասաց նա:
Հարցին, թե արդյոք սա բավարա՞ր է, որ ակնակալենք դատախազության աշխատանքի արդյունավետության բարձրացում, Սաքունցը պատասխանեց. «Այստեղ գալիս է բարեվարքությունը, քանի որ եթե այդ ինստիտուտը չկիրառես, ոչինչ չի ստացվի։ Պետք է պահպանել մրցութային կանոնները շահերի բախման հետ կապված, բազմաթիվ այլ կանոններ՝ հնարավոր դիմողների համար: Այստեղ շատ կարևոր է սկզբունքների պաշտպանությունը, որպեսզի այդ շատ բարձր աշխատավարձը ստանան մարդիկ, որոնք ձգտում են պատշաճ կատարել իրենց աշխատանքը։ Սա վերաբերում է ամբողջ իրավապահ մարմիններին:
Տեսեք, երբ դու կրթության հաստատությունում ատեստացիա ես պահանջում, ուսուցիչներին ասում ես, որ ձեր աշխատավարձը կբարձրանա, եթե դուք անցնեք ատեստացիա, հիմա հարց է առաջանում կրթության բնագավառը կարևոր չէ՞, որ տարբերակված մոտեցում է ցուցաբերվում։
Եթե ես տեսնում եմ, որ նույն բարեվարքության կանոնների հավելավճարի ձևով բարձրացնում են մարդու եկամուտը, բայց բարեվարքության կանոնների ներդրում չի լինում քննչական, այլ մարմիններում, ապա հարց է առաջանում՝ ինչու չի կարող հատային մոտեցումներով խնդրին լուծում տալ»,-հայտարարեց Սաքունցը:
Նա նկատեց, որ եթե առանձին մոտեցում է ցուցաբերվում դատախազության նկատմամբ, նշանակում է, որ կարևորվում է դատախազության ինստիտուտի դերը. «Ինչո՞ւ նույն սկզբունքով չի կարևորվում կրթական բնագավառի դերը, քննչական մարմինների դերը։ Վերջին հաշվով անկյունաքարային է անկախ դատական համակարգում բարեվարքության իրականացումը, դատավորների թվի ավելացումը, մի դատավորը մինչև 3000 գործ է ունենում և ֆիզիկապես չի հասցնում: Ես չեմ ասում՝ դատախազությունը կարևոր չէ, բայց նույն կերպ կարևոր են մյուս ոլորոտները»,-ընդգծեց իրավապաշտպանը:
