Գործազրկության մակարդակը Հայաստանում զգալի նվազել է 2022 թվականի 3-րդ եռամսյակին կազմելով 11,6%, այս մասին վերջերս գրառում է կատարել իր ֆեյաբուքյան էջում ԱԺ ֆինանսավարկային և բյուջետային հարցերի հանձնաժողովի նախագահ Գևորգ Պապոյանը:
Եթե 2021 թվականի հունվար և նոյեմբեր ամիսներին Հայաստանում գործազուրկների թիվը կազմում էր մոտ 61000 գործազուրկ, ապա 2022 թվականին նույն ամիսներին այդ թիվը նվազել է հասնելով 53000 հազարի։
Տնտեսագետ Աղասի Թավադյանը, նշում է, որ պետք է ավելի ուշադիր ուսումնասիրել դաշտը և հասկանալ ՝ ինչ գործոններ են նպաստել այդ թվի նվազմանը. «Կարևոր է հատուկ ուշադրություն դարձնել բուն գործազուրկների քանակին` միևնույն ժամանակ խնդիրը դիտարկելով ընդհանուր գործազրկության համապատկերում, որովհետև հնարավոր է, որ գործազուրկների ընդհանուր թվաքանակի նվազումը լինի բնակչության թվաքանակի նվազման հաշվին, ուստի մեկ ցուցանիշի վրա հենվելով գնահատական տալը տեղին չէ։ Թեև վերջին տարիներին Հայաստանում գործազրկության ցուցանիշը որոշակիորեն նվազել է, սակայն պետք է հաշվի առնել, թե կոնկրետ ինչ գործոնների հաշվին է այդ առաջընթացը գրանցվել»,– նշում է նա։
Գործազրկությանը զուգահեռ աճել է աշխատուժի քանակը, հիմնականում տեղեկատվական տեխնոլոգիաների, սպասարկման, մշակվող արդյունաբերության և շինարարության ոլորտներում։
65-ամյա Սուսաննա Խաչատրյանը, ով հայոց լեզվի և գրականության ուսուցչուհի է եղել 40 տարի, գոհ չէ ինչպես տնտեսական աճից, այնպես էլ գործազրկության մակարդակի նվազման ցուցանիշներից .«Ես 40 տարվա մանկավարժ եմ, արդեն 2 տարի է, ինչ ազատվել եմ աշխատանքից, ճիշտ է, կողմ եմ, որ նոր կադրեր ևս ավելանան բոլոր բնագավառներում, բայց ինչու եղածը և ավելի փորձառուն հանելու հաշվին, միշտ ապրել եմ Հայաստանում, ու տեսնում եմ՝ ինչպես է ամեն բան օրեցօր թանկանում, եթե դա տնտեսական աճն է, ապա ես այն աճ չեմ համարում. թանկացման հաշվին, ինչ տնտեսական աճի մասին է խոսքը»։
Չնայած աշխատուժի ավելացմանը, որակավորված մասնագետների բավականին մեծ պակաս ևս զգացվում է։
«Տնտեսական աճ ապահովելու համար մեզ անհրաժեշտ են մեծ թվով որակավորված բարձրորակ մասնագետներ, ինչպես նաև մենք պետք է խրախուսենք ցանկացած ոլորտներում բիզնես գործունեությունը», -նշում է Աղասի Թավադյանը։
Մինչդեռ աշխատողների թիվը ավելանում է տեղեկատվական տեխնոլոգիաների բնագավառում, այսօր ունենք աշխատատեղեր, որոնք թափուր են մնացել, մասնագետների բացակայության պատճառով։
«Ունենք բավական լուրջ պահանջարկ աշխատողների բնագավառում. դա շինարարության ոլորտում, գյուղատնտեսության ոլորտում, հասարակ կոշկակար, ավտոմեխանիկ, կռունկավար և շատ մասնագետների այսօր գրեթե անհնար է գտնել, բայց միևնույն ժամանակ մեր հայրենակիցներից շատերը այդ աշխատանքները նախընտրում են կատարել Հայաստանից դուրս՝ ավելի բարձր աշխատավարձի դիմաց», -հավելում է Աղասի Թավադյանը։
48-ամյա Կարեն Գասպարյանը արդեն 8 տարի է՝ ապրում է իր հայրենիքից հեռու և աշխատում է արտերկրում կռունկավար, նա նշում է, որ չնայած կարոտում է իր հողը, հարազատներին, բայց այստեղ նա չի կարողանա վաստակել այն գումարը, որը ստանում է արտերկրում.«Ես արդեն 8 տարի ապրում եմ Ռուսաստանում, կարոտում եմ, ճիշտ է, բայց ինչ անեմ, այնտեղ ամեն ինչ ավելի էժան է, իսկ աշխատավարձը այստեղի համեմատ բաձր, ես այստեղ աշխատելով չեմ կարողանա ապահովել երեխաներիս ուսման վարձերը, նրանց նորմալ ապրուստը, ստիպված ամեն տարի գարնանը գնում եմ, իսկ ձմռան կեսերին գալիս ընտանիքիս տեսնում, էլի գնում»։
2022թ–ի հունվար–նոյեմբեր ամիսների տվյալներով՝ Հայաստանում գրանցվել է ԵԱՏՄ երկրների շարքում գործազրկության ամենաբարձր մակարդակը։
Եվրասիական տնտեսական հանձնաժողովի հրապարակած վիճակագրության համաձայն՝ 2022 թվականի նոյեմբերի վերջին Հայաստանում գործազրկությունը կազմել է աշխատունակ բնակչության 3,6%–ը (49 600 մարդ)։
Նշենք, որ ԵՏՀ-ի կազմած վիճակագրության համար հիմք են ընդունվել ԵԱՏՄ անդամ երկրներում գործող զբաղվածության կենտրոններում հաշվառված 15-74 տարեկան այն քաղաքացիների տվյալները, որոնք որևէ աշխատանք կամ այլ եկամտաբեր զբաղվածություն այդ պահին չեն ունեցել և հանդիսացել են ակտիվ աշխատանք փնտրող անձ։
