Ընդդիմությունը հրաժարվել է տեղեկացված լինել բանակցային գործընթացից։ Այս մասին Ազգային ժողովում լրագրողների հետ ճեպազրույցում ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը` անդրադառնալով հարցին, թե ինչու ընդդիմությունը հնարավորություն չունի ծանոթանալու Ադրբեջանի հետ բանակցություններին։
Իշխող ուժի պատգամավորը վստահեցնում է` իշխանությունը այդ առումով որևէ խոչընդոտ չի ստեղծել ընդդիմության համար։
«Թե՛ ՀՀ վարչապետը, թե՛ այլ պաշտոնատար անձինք առաջարկով են հանդես եկել որպեսզի ընդդիմությունը գա և ծանոթանա բանակցային գործընթացի նրբություններին և այլ դրվագներին, որոնք կան այսօր ՀՀ–Ադրբեջան գործընթացում։ Մենք չենք ստացել որևէ պատասխան»,–ասաց Հովհաննիսյանը։
Նրա դիտարկմամբ` տեղեկատվություն կրելը ենթադրում է պատասխանատվություն, և ընդդիմության կողմից հրաժարվելը աշխատանքային քննարկման ժամանակ դրվագներին ծանոթանալու՝ գնահատում է որպես պատասխանատվությունից խուսափում ընդդիմության կողմից։
«Մենք առաջարկել ենք, ընդդիմությունը փախել է պատասխանատվությունից»,–պնդում է պատգամավորը։
