Ադրբեջանի նախագահ Ալիևն ու նրա ենթակաները սկսել են բավականին հաճախակի խոսել այն մասին, թե Հայաստանն իբրև թե «ծածկվելով» կամ «պատսպարվելով» Եվրամիության դիտորդների մոնիտորինգային առաքելության հետևում, խախտում են հրադադարը, օգտվելով իբրև թե առիթից, որ Բաքուն չի կրակում՝ հաշվի առնելով դիտորդական ներկայությունը: Ալիևն այդ միտքը արտահայտել է ընդհուպ ԱՄՆ պետքարտուղարի հետ հեռախոսազրույցում, ինչը նշանակում է, որ Բաքվի համար դա լոկ քարոզչական միտք չէ, այլ քաղաքական գործողությունների տարր, որոնցով Ադրբեջանը ստեղծում է եվրադիտորդական առաքելության պայմաններում սահմանային ռազմական սադրանքի գնալու հիմք, հող: Այդ իրողության պարագայում չափազանց կարևոր է դիտորդների չլռելը:
Դիտորդների, կամ նրանց վերադասների, մասնավորապես Եվրամիության ղեկավարության, ԵԽ ղեկավարության, նրանց հատուկ ներկայացուցիչ Տոյվո Կլաարի, որն օրերս մտահոգություն էր հայտնել իրավիճակի լարվածության առնչությամբ, բայց հերթական անհասցե, անառարկայական մտահոգությունը: Մինչդեռ, պետք է արտահայտել ոչ թե անհասցե ու ընդհանրական մտահոգություն, այլ շատ հստակ, հասցեական և կոնկրետ գնահատական տալ Բաքվից հնչող շատ կոնկրետ «մեղադրանքի»:
Մասնավորապես, ԵՄ դիտորդները իրենք, կամ իրենց վերադասների միջոցով պետք է հստակ արձագանքեն՝ այս ընթացքում արձանագրե՞լ են հայ-ադրբեջանական սահմանին Հայաստանից հրադադարի խախտում, Ալիևը «ճի՞շտ» է ասում, թե՞ ոչ: Եթե Ալիևը ««ճիշտ» է ասում, ապա Եվրամիության ներկայացուցիչները պետք է շատ հստակ արձանագրեն դա և հորդորեն Երևանին չանել գործողություններ, որոնք խախտում են հրադադարը կամ պարունակում էսկալացիայի ռիսկ: Իսկ, եթե Ալիևը ստում է, հող նախապատրաստելով ԵՄ դիտորդական առաքելության պայմաններում ռազմական սադրանքի գնալու և պատասխանատվությունը Հայաստանի վրա թողնելու համար, ապա ԵՄ լռությունը կլինի ուղիղ աջակցոււթյուն Ալիևի այդ նենգափոխումներին և սադրանքների մտադրությանը: Ադրբեջանի հռետորաբանությունը, առավել ևս այն ընդհուպ ԱՄՆ պետքարտուղարի հետ հեռախոսազրույցի մակարդակում արտահայտելը, հրամայական է դարձնում Եվրամիության չլռելը և դիտորդական առաքելությունը հենց այժմ պետք է հստակ ի ցույց դնի կայունությանը նպաստելու իր գործնական էֆեկտիվությունը, եթե կա դրա ներուժն ու իրական ցանկությունը:
