Մարտի 17-ին Երևանի քաղաքապետ Հրաչյա Սարգսյանը հրաժարական տվեց։ Այս ընթացքում քննարկվում է՝ արդյոք կլինեն արտահերթ, թե հերթական Երևանի ավագանու ընտրությունները։
Հելսինկյան քաղաքացիական ասամբլեայի Վանաձորի գրասենյակի ժողովրդավարական ինստիտուտների մոնիտորինգի և զեկուցման համակարգող Վարդինե Գրիգորյանը «Առաջին լրատվական»-ի հետ զրույցում նշեց որ արտահերթ ընտրություններ, ինչպես 2018-ին եղավ, կլինեն այն դեպքում, եթե ավագանին երկու շաբաթվա ընթացքում իր կազմից չընտրի համայնքի ղեկավար։
«Այսինքն՝ այս պահին, նրա խոսքով, դեռ կա ժամանակ առաջադրելու քաղաքապետի թեկնածու, որը պետք է պարտադիր լինի ավագանու անդամներից մեկը: Չեն կարող ուրիշ մեկին առաջադրել և ընտրել, իսկ եթե այդ ընթացքում չլինի թեկնածու, ապա ավագանու գործողությունների ժամկետը կկրճատվի»,-ասաց Վարդինե Գրիգորյանը:
Նա նկատեց, որ ՏԻՄ-երի դեպքում որոշում ընդունվեց և նախատեսվեց, որ եթե համայնքի ղեկավար չեն ընտրում, կարող են նշանակել ժամանակավոր պաշտոնակատար. «Այսինքն ՏԻՄ-երի մասով նման կարգավորում մտցվեց, բայց դա չի վերաբերում Երևանին, քանի որ Երևանի մասին օրենքն առանձին օրենք է, և դրա մեջ այդ կարգավորումը չկա։ Ստացվում է, որ կամ նոր փոփոխություն կանեն, որը միանգամից ուժի մեջ կմտնի՝ տալով այդ հնարավորությունը, կամ կընտրեն նոր համայնքի ղեկավար ավագանու կազմից, կամ կհամարեն վաղաժամկետ դադարեցված լիազորությունները և արտահերթ ընտրություններ կնշանակեն»:
Վարդինե Գրիգորյանի խոսքով, որպեսզի կառավարությունը նշանակի ավագանու արտահերթ ընտրություններ, առաջին հերթին նա պետք է կրճատի Ավագանու լիազորությունների ժամկետը. «2018-ին այդպես եղավ, երբ Տարոն Մարգարյանի հրաժարականից հետո, երբ չկային թեկնածուներ, կառավարությունը որոշումով կրճատեց ժամկետը և նշանակեց նոր ընտրություններ։ Նույն գործընթացն է։ Քանի դեռ ավագանու լիազորությունները շարունակվում են, ավագանին ինքն է իր կազմից համայնքի ղեկավար ընտրում, իսկ ժամկետի կրճատելը փաստացի նոր արտահերթ ընտրություններ է նշանակում:
Իսկ ժամկետը կրճատելու համար անհրաժեշտ է, որ եթե այս պահից հաշվենք նշված երեք ամիսը, կստացվի, որ այսպիսի որոշում կառավարությունը կարող է կայացնել այս տարվա հունիսի 17-ից ոչ շուտ, իսկ արտահերթ ընտրությունները նշանակվում են ավագանու լիազորությունների ժամկետը կրճատելուց հետո ոչ շուտ, քան 30, և ոչ ուշ, քան 40 օրվա ընթացքում»,-հայտարարեց փորձագետը:
Անդրադառնալով պնդումներին, որ Հրաչյա Սարգսյանի հրաժարականից առաջ և հետո Տիգրան Ավինյանը քարոզարշավ է իրականացնում, Վարդինե Գրիգորյանը նկատեց, որ քանի դեռ ԿԸՀ-ն նրանց չի գրանցել որպես թեկնածու, նրանք ազատ են իրենց գործողություններում, քանի որ իրենք օրենքի տեսանկյունից պատասխանատու անձ չեն. «Սա իմ կարծիքով օրենքի բաց է, պետք է պատասխանատվություն կրեին առնվազն պաշտոն զբաղեցնող անձինք, որոնք հայտարարում են վերընտրության մտադրության մասին: Մեր օրենսդրության տրամաբանությամբ, քանի դեռ նրանք չեն գրանցվել որպես թեկնածու, իրենք չեն համարվում թեկնածուներ անկախ նրանից, թե որքանով են հայտարարել այդ մասին, այդ դեպքում սահմանափակում իրենց քարոզչության մեջ չկա»:
Նշենք, որ Երևանի մասին օրենքի համաձայն քաղաքապետի արտահերթ ընտրություններն անցկացվում են հետևյալ կարգով՝ քաղաքապետի պաշտոնը թափուր մնալուց հետո՝ երրորդ աշխատանքային օրը օրենքի ուժով հրավիրվում է ավագանու նիստ, որում որոշվում է քաղաքապետի արտահերթ ընտրության օրը, ընդ որում՝ քաղաքապետի պաշտոնը թափուր մնալուց հետո քաղաքապետի արտահերթ ընտրություններն անցկացվում են ոչ ուշ, քան մեկամսյա ժամկետում:
