Միջազգային քրեական դատարանի որոշման հետևանքները մենք դեռ կզգանք․ Հայաստանի հստակ կողմնորոշվելու հարցն է առաջ եկել: «Առաջին լրատվական»-ի հետ զրույցում նշեց պրոֆեսոր, ռեժիսոր Ռուբեն Բաբայանը:
Բաբայանի խոսքով՝ բռնապետների համար պատերազմը միակ միջոցն է իշխանությունը պահելու համար․ «Խաղաղությունը բռնապետների համար մահ է․ Մեր թշնամին և դաշնակիցը գտնվում են այդ գաղափարի շրջանակում: Եթե նույնիսկ վաղը պատերազմը դադարի, Պուտինի նկատմամբ ՔՄԴ որոշումը չի դադարի: ՔՄԴ որոշումից հետո շատ կարևոր է, թե Հայաստանը ինչպես է դրսևորելու իրեն ՌԴ նկատմամբ»:
Ռեժիսորը կարծում է, որ և Սփյուռքի, և Հայաստանի համար կենսական գաղափարը ՀՀ ամրապնդումն է և ինքնիշխանության կայացումը․ «Անկախություն չի նշանակում ինքնիշխանություն․ Մենք շատ ենք խառնում այդ հասկացությունները: Որն է ավելի կարևոր Արցախի համար՝ ինքնիշխանությունը, թե ճանաչումը: Արցախին պետք է ինքնիշխանություն, որը կհանգեցնի անկախության»:
