Մարտի 23-ին Նովրուզը նշելու համար հայաստանցիները պատրաստ են ընդունելու իրանցի հարևաններին։ Սակայն վերջին տարիներին, այնուամենայնիվ, որոշակի նվազում կա՝ պայմանավորված Իրանում ֆինասական խնդիրներով։
Տուրիզմի հայկական ֆեդերացիայի (ՏՀՖ) նախագահ Մեխակ Ապրեսյանը «Առաջին լրատվական»-ի հետ զրույցում նշեց, որ 2019 թվականին ընդհանուր այցելությունների մեջ տեսակարար կշիռը Իրանից եղել է հինգ տոկոս. «2019-ին ունեցել ենք մեկ միլիոն 894 հազար այցելու։ 2020 թվականին շեշտակի նվազում է եղել, ինչպես բոլոր երկրներում։ Տոկոսային առումով, ըստ էության, աճ է եղել, եթե 2019-ին Իրանից այցելությունները 5 տոկոս են եղել, ապա 2020 թվականին՝ 6,9 տոկոս, բայց բացարձակ թվով շուրջ 26 000: Մեր ընդհանուր այցելությունները կազմել են 375 000: Այդ թվի գերակշռի մասը առաջին եռամսյակում է գրանցվել, երբ դեռ կարանտին չէր հայտարարվել»,-ասաց նա:
Ըստ Ապրեսյանի, 2021-ին իրավիճակը բավականին լավացել է, ունեցել ենք 96․000 այցելություն Իրանից, սա եղել է ընդհանուր այցելությունների 11 տոկոսը. «Ընդ որում՝ ստացվում է, որ տեսակարար կշռով երրորդ տեղն է եղել, Այցերի մոտ 41, 5 տոկոսը Ռուսաստանից է եղել, 13,5 տոկոսը՝ ընդհանուր ԵՄ երկրներից և 11 տոկոսը՝ Իրանից։ 2022-ին Իրանից ավելի շատ այցելություններ ենք ունեցել։ Թեև դրանք կազմել են ընդհանուր այցելությունների 6,8 տոկոսը, բայց ընդհանուր այցելությունները 2022-ին եղել է մեկ միլիոն 665 հազար, որից ավելի քան 113․000-ը Իրանից: Այսինքն ունեցել ենք աճ Իրանից, բայց մենք կունենայինք ավելի լավ պատկեր, եթե դրան նպաստեր ֆինանսական հնարավորությունները»:
Մեխակ Ապրեսյանը հիշեցրեց, որ 2022-ին հայ-իրանական կարևոր միջոցառում է կազմակերպվել Նավասարդ խորագրով:
«Իրանում ֆինանսական առումով այնքան էլ բարենպաստ պայմաններ չեն թե այս , թե նախորդ տարի, ու չնայած դրան, դեռ այցելությունների թվի աճ կա։ Բացի այդ, կորոնավիրուս, պատերազմ, դրանք բոլորը էական խոչընդոտ են եղել բոլոր առումներով, գումարած դրան Իրանում դոլարի գինը բարձրացել է, ինֆլյացիա կա , իսկ մեզ մոտ, ընդհակառակը: Այդ իմաստով իրանցիների համար զբոսաշրջային արժեքը թանկանում է, ինչն էլ խոչընդոտում է Իրանից այցելություններին։
Իրանցիները մեծ հաճույքով են գալիս Հայաստան, խնդիրը դոլարի աժեզրկումն է, դրամն է խիստ արժևորվել 25 տոկոսով։
Այսինքն՝ ֆինանսական առումով իրանցիների համար այնքան էլ բարենպաստ պայմաններ չեն Հայաստան այցելելու։ Փաստացի, Իրանից այցելությունների տեմպի անկումը պայմանավորված է դոլարի արժևորմամբ։ Կորանավիրուսը և տարածաշրջանում ոչ կայուն վիճակը միշտ զբոսաշրջության վրա ունենում է մեծ ազդեցություն»,-ասաց Ապրեսյանը:
Նա նաև նկատեց, որ ընդհանուր Հայաստան այցելությունների մեջ ամենամեծ տեսակարար կշիռը միշտ կազմել են Ռուսաստանից այցելությունները և այդ միտումը պահպանվում է մինչ օրս:
