Այսօր բողոքի զանգվածային ցույցեր են տեղի ունենում ամբողջ Իսրայելում, ցուցարարները հանդես են գալիս վարչապետ Բենյամին Նեթանյահուի կառավարության և նրա ծրագրած դատական համակարգի բարեփոխումների դեմ: Թել Ավիվում հազարավոր ցուցարարներ են դուրս եկել ընդդիմության երթերին: Այդ մասին հաղորդում է ТАСС գործակալությանը։
Վաղ առավոտից քաղաքի տարբեր շրջաններում տեղի են ունենում տարբեր մասշտաբի ու ձևաչափերի ակցիաներ։ Ցուցարարների մի քանի խմբեր երթեր են կազմակերպել քաղաքի արևելքում գտնվող գլխավոր փողոցներով։ Ցուցարարների ևս մեկ խումբ հանրահավաք Է կազմակերպել Թել Ավիվում ԱՄՆ հյուպատոսության առջև։
Ակցիաների մասնակիցները վանկարկում են ժողովրդավարության պաշտպանության կարգախոսներ։ Տեղ-տեղ նրանք փորձում են արգելափակել երթևեկությունը։ Ակնկալվում է, որ բողոքի ակցիաները կշարունակվեն մինչև երեկո։
Անկարգություններից խուսափելու համար Իսրայելի ոստիկանությունը ձեռնակում Է անվտանգության խստացված միջոցառումներ։ Ընդդիմության զանգվածային ցույցերը Նեթանյահուի կաբինետի դեմ, որը երկրի կառավարումն ստանձնել Է անցյալ տարվա վերջին, շարունակվում են հունվարի սկզբից։
Բողոքների առիթ է ծառայել նոր կառավարության առաջարկած դատական բարեփոխման նախագիծը: Այն նախատեսում Է Գերագույն դատարանի լիազորությունների սահմանափակում և դատավորների ընտրության նկատմամբ վերահսկողության տրամադրում իշխանության գործադիր ճյուղին:
Ընդդիմության կարծիքով՝ այս բարեփոխումը խարխլում է պետության ժողովրդավարական հիմքերը։
Նեթանյահուն պնդում է, որ իր կառավարությունը ձևավորվել է ժողովրդավարական ընտրությունների արդյունքներով և կիրականացնի այն ծրագիրը, որին կողմ է քվեարկել ընտրողների մեծամասնությունը։
Մարտի 15-ի երեկոյան Իսրայելի նախագահ Իսահակ Հերցոգը բողոքի ակցիաների առնչությամբ հեռուստաուղերձով դիմել է համաքաղաքացիներին՝ նշելով, որ երկիրը հայտնվել է սուր քաղաքացիական հակամարտության շեմին: Նա բոլոր կողմերին երկխոսության կոչ է արել։
Այդ նպատակով նախագահն առաջարկել Է դատական բարեփոխման իր ծրագիր, որը, նրա գնահատմամբ, հաշվի է առնում բոլոր կողմերի տեսակետները և փոխզիջումային է։
Նեթանյահուն և իշխող կոալիցիայի առաջնորդները մերժել են առաջարկը՝ ասելով, որ այն թույլ չի տա հասնել իշխանության ճյուղերի միջև հավասարակշռության, որին ձգտում են իրենք: