G7-ի երկրները դեմ են հանդես գալիս Ռուսաստանից նավթի գների վերին շեմն իջեցնելու գաղափարին և ցանկանում են այն թողնել ներկայիս 1 բարելի դիմաց 60 դոլարի մակարդակում:
Այս մասին հաղորդում Է The Wall Street Journal-ը՝ վկայակոչելով աղբյուրների։ «G7-ը ցանկանում է ռուսական նավթի գների վերին շեմը պահպանել մեկ բարելի դիմաց 60 դոլարի մակարդակում, ինչը հուսախաբ Է անում եվրոպական առանձին երկրների իշխանություններին այն հարցում, որ այս ամիս արևմտյան պատժամիջոցները կխստացվեն», – հաղորդել են հարցին իրազեկ աղբյուրները: Հրատարակության զրուցակիցների խոսքով՝ «Եվրահանձնաժողովի պաշտոնյաները միության անդամ երկրներին տեղեկացրել են «Մեծ յոթնյակի» երկրների դիրքորոշման մասին»։
«Միացյալ Նահանգների նախագահ Ջո Բայդենը անցյալ շաբաթ Սպիտակ տան Օվալաձև կաբինետում կայացած հանդիպման ժամանակ Եվրահանձնաժողովի ղեկավար Ուրսուլա ֆոն դեր Լայենին հայտնել է, որ Վաշինգտոնը ցանկություն չունի փոփոխել նավթի հետ կապված պատժամիջոցները», – նշել են աղբյուրները:
Այս շաբաթ ԵՄ երկրների ներկայացուցիչներն սկսում են ռուսական նավթի գնի վերին շեմի հնարավոր վերանայման քննարկումը։ Առկա պայմանավորվածությունների համաձայն՝ վերանայումն իրականացվում է երկու ամիսը մեկ անգամ։ Հունվարին բանակցությունների արդյունքում որոշվել Էր վերին շեմը պահել 1 բարելի դիմաց 60 դոլարի մակարդակում։ Ինչպես ավելի վաղ հայտնել էր «Արմենպրես»-ը, վկայակոչելով Bloomberg գործակալությանը, Լեհաստանի, Լատվիայի և Լիտվայի իշխանությունները կոչ են անում Ռուսաստանից նավթի գնի վերին շեմը նվազեցնել` հասցնելով մեկ բարելի դիմաց մինչև 51,45 դոլարի:
