Հանուն հանրապետության կուսակցության նախագահ Արման Բաբաջանյանը ֆեյսբուքյան իր էջում գրել է. 44-օրյա պատերազմում Հայաստանը պարտվել է, որովհետև բանակում գործել է հինգերորդ շարասյուն, նախօրեին հայտարարեց Հայաստանի վարչապետ Նիկոլ Փաշինյանը:
Նիկոլ Փաշինյանը մեղադրում է 5-րդ շարասյանը, նրա ընդդիմախոսները նույն տրամաբանությամբ՝ դավաճանության, օտար ուժերի պատվեր կատարելու համար նրան ու բոլորիս են մեղադրում:
Սա իրապես հասարակական-քաղաքական հոգեխանգարմունք է, որտեղ քաղաքական տարբեր ուժեր լուծում են իրենց հարցերը, սակայն հանրային մտածողության ու հոգեբանության մեջ պարզապես քայքայվում է պետականության զգացումը,
Սա բոլորովին կապ չունի դավաճան կամ լրտես, գործակալ լինել-չլինելու հետ:
Բայց, այդ ամենին պետք էր հիմնարար լուծում տրվեր, լուծում գտնվեր երբ այս բոլորի մասին բարձրաձայնում էի Ազգային ժողովում, իմ հանրային ելույթներում և հարցազրույցներում, երբ դրա համար կար պատեհ պահ և ահռելի էներգիա, պատուհան և հնարավորություն:
Որևէ հիմք չունեմ կարծելու, որ դուռը կողպված է և հեղափոխական թիմը չի կարող կամ կաշկանդված է այսօր անցյալին իրավաքաղաքական գնահատական տալ: Բայց ես վստահ եմ, որ այդ գնահատականը չի տրվելու, որովհետև նախ այդ գնահատականի նշանակությունն ու իմաստը մինչև վերջ հասկացված չէ, իսկ նրանք ովքեր հասկանում են պարզապես ի վիճակի չեն չունեն կարողություն հաղթահարել, կրել այդ գնահատականից անխուսափելիորոն բխող հետևանքները:
Բայց եթե որոշվել է այնուամենայնիվ, որ այս բանավեճը պետք է անպայման ծավալվի, ինչ նպատակ էլ դրել եք սրա հիմքում այն պետք է ծավալվի պրոֆեսիոնալ ինստիտուցիոնալ դաշտում, ուղեկցվի հստակ և համոզիչ փաստարկներով և ավարտվի դատական վճիռներով, որոնք դարձյալ՝ կլինեն օրինականության և իրավականության տեսանկյունից անթերի, ըստ այդմ՝ փաստարկված, ապացուցված, համոզիչ:
Որպեսզի խնդիրը իռացիոնալ, զգայական և ըստ այդմ նաև մանիպուլյատիվ դաշտից տեղափոխվի պետական ինստիտուցիոնալ դաշտ և դրանով հանդերձ նաև դառնա հանրության ինքնավստահության վերականգնման գործոն:
Հակառակ դեպքում, համատարած դավաճանամոլությունը կամ գործակալամոլությունը բերում է հանրային շիզոֆրենիայի, որը հենց այն նպատակն է, որ Հայաստանի հանդեպ կարող է ունենալ երկրի ներուժը և դիմադրունակությունը թուլացնելու որևէ նպատակ հետապնդող որևէ ներքին կամ արտաքին ուժ:
