Հնագետ, պատմաբան Համլետ Պետրոսյանը «Ինքնություն» հաղորդաշարի շրջանակում ներկայացրել է Դվինի կենտրոնական թաղամասին կից տարածքը:
«Քանի որ կառավարության որոշմամբ Դվինը պետք է դառնա զբոսաշրջության կարևոր կենտրոններից մեկը, կենտրոնական թաղամասում վերականգնել են եկեղեցին, 5-6-րդ դարերի պալատները, կամուրջի խելերը և այլ: Հիմա այնտեղ պետք է կառուցվի նաև շատ մեծ թանգարան, հինագիտական արշավախմբի հանգրվանը, և մենք որոշեցինք, որ դա Դվինի հիմնական պեղվող տարածքից դուրս գտնվի: Այսօր սկսել ենք այնտեղ, որտեղ պետք է այդ կառույցը լինի, նրա հնագիտական ստուգումը: Նոր ենք սկսել, պետք է կենտրոնական հատվածում մոտ 20 մետրը 2 մետրի վրա խրամատ փորենք, հետազոտենք բոլոր հնագիտական շերտերը և տեսնենք, թե հնարավո՞ր է այստեղ այդ կառույցը դնել, թե ոչ:
Այս հատվածում երբեք պեղումներ չեն արել, սա առաջին անգամն է: Դվինը մի քանի հարյուր հա է զբաղեցնում, և որտեղ էլ փորենք ինչ-որ մի բան դուրս կգա: Դրա համար ուզում ենք նախ ստուգել, որ տեսնել՝ այստեղ հնարավոր է տեղադրել կառույցը, թե ոչ»,-պատմել է հնագետը:
Արդեն ծրագրերը կան, Համաշխարհային բանկն ու Տարածքային զարգացման հիմնադրամը աշխատում են այդ ուղղությամբ.«Ես ենթադրում եմ, որ 2-3 տարի հետո մենք այստեղ կունենանք և այդ կառույցը, և ուզում ենք այս ամբողջ տարածքը դարձնել հուշարձան: Դվինը ամենահարուստ հուշարձանն է քարե կոթողներով՝ սկսած արտնին օգտագործման զանազան առարկաներից մինչև մ.թ.ա. 7-6-րդ դարերի մարդակերպ կոթողները, սարկոֆագերը, վաղ քրիստոնեական կոթողները, տապանաքարերը: Ընդ որում, Դվինում հայտնի են առաջին հայերեն արձանագրությունները՝ գրված սարկոֆագերի կափարիչների վրա: Մենք նպատակ ունենք այդ բոլորը տեղափոխել այստեղ»:
