Ռուսաստանի և Բելառուսի դեմ Եվրամիության պատժամիջոցները զգալիորեն ավելացրել են 2022 թ.-ի մաքսային իրավախախտումների թիվը ՌԴ-ի հետ սահմանին: Նման հայտարարություն է արել Ֆինլանդիայի մաքսատունը։
Այդ մասին տեղեկանում ենք «РИА Новости» գործակալությունից: «Կարգավորման ոլորտում իրավախախտումների հսկայական աճը վերջին տարվա ամենաէական փոփոխություններից մեկն է: 2022 թ.-ին Ռուսաստանի և Բելառուսի դեմ պատժամիջոցների հետևանքով կարգավորման ոլորտում իրավախախտումների թիվը, որոնց շուրջ անցկացվել Է նախնական հետաքննություն, գերազանցել Է 300-ը:
Սովորաբար տարվա ընթացքում արձանագրվում էր կարգավորման ոլորտում ենթադրյալ իրավախախտումների միայն մի քանի դեպք», – հաղորդագրության մեջ մեջբերվում է Ֆինլանդիայի մաքսատան իրավակիրառման բաժնի ղեկավար Հանու Սինկոնենի խոսքը: Ըստ հաղորդագրության՝ 2022 թ.-ին Ֆինլանդիայի մաքսայինները հայտնաբերել են 6482 մաքսային իրավախախտում՝ ավելի քան հազարով ավելի, քան 2021 թ.-ին:
Ընդհանուր առմամբ, Ֆինլանդիայի մաքսայինները 2022 թ.-ին կանխել են ավելի քան 100 միլիոն եվրո գումարի մաքսային խախտումներ։ Մոսկվան քանիցս հայտարարել է, որ երկիրը հաղթահարելու է պատժամիջոցների ճնշումը, որն Արևմուտքը սկսել է Ռուսաստանի նկատմամբ կիրառել մի քանի տարի առաջ և շարունակում է ուժեղացնել։ Մոսկվայում նշել են, որ Արևմուտքը քաջություն չունի ընդունելու Ռուսաստանի Դաշնության դեմ պատժամիջոցների ձախողումը։ «РИА Новости»-ն հավելում է, որ արևմտյան երկրներում մեկ անգամ չէ, որ կարծիքներ են հնչել, թե հակառուսական պատժամիջոցներն անարդյունավետ են։
