«Առաջին լրատվական»-ի զրուցակիցն է վրաց փորձագետ Գելա Վասաձեն։
-Պարոն Վասաձե, ինչպե՞ս եք գնահատում իրավիճակը Թբիլիսիում այժմ, «Արտաքին ազդեցության թափանցիկության մասին» օրենքի դեմ բողոքի ակցիաները կարո՞ղ են հանգեցնել Վրաստանում իշխանափոխության։
–Վրաստանում տեղի ունեցող իրադարձությունները կարող են բերել թե՛ իշխանափոխության և թե՛ ցանկացած այլ զարգացումների։ Իրավիճակն այժմ անկանխատեսելի է, երկրում կա խորը քաղաքական ճգնաժամ։ Կանխատեսումներ անելը ծայրահեղ անշնորհակալ գործ է, բայց այն, որ իրավիճակը ծայրաստիճան լարված է և Վրաստանում հերթական քաղաքական ճգնաժամն է՝ դա փաստ է։
– Հնարավո՞ր է, որ Վրաստանի իշխանությունները պատրաստվում են այս կերպ փոխել արտաքին քաղաքական վեկտորը։
-Հնարավոր չէ, որ Վրաստանի իշխանությունները ցանկանան փոխել քաղաքական վեկտորը, այլ հարց է, որ եվրոպական քաղաքական վեկտորը հիմա նրանց ձեռնտու չէ։ Ուստի հիմա նրանք հետևյալն են անում. ուզում են արևմուտքից թույլտվություն ստանալ, որ Ռուսաստանի հետ կարողանան առևտուր անել։ Ահա սա է Վրաստանի իշխանությունների արածը, իսկ վեկտորը մեր մոտ ամրագրված է սահմանադրության մեջ և այն փոխելը գործնականում սահմանադրական հեղաշրջում կնշանակի։ Արդյոք իրենք կգան նման քայլի, հիմա հաստատ չէ։ Միգուցե եթե կարողանան ամեն ինչ անցկացնել, անեն դա, բայց հասարակությունը նրանց հիմա ցույց է տալիս, որ ամեն ինչ չէ, որ իրենք կարող են անել։
-Արդյո՞ք Վրաստանը կստանա անհրաժեշտ աջակցություն Արևմուտքից, և խոսքը միայն դատապարտման և հայտարարությունների մասին չէ:
-Արևմուտքից աջակցությունը կարող է լինել կոնկրետ անձանց նկատմամբ պատժամիջոցները և ես կարծում եմ, որ իրավիճակը հենց դրան է տանում։ Իրավիճակը հետևյալն է. և՛ ԱՄՆ-ն և՛ Եվրամիությունը արդեն զգուշացրել են Վրաստանի իշխանությունների կոնկրետ անձանց նկատմամբ պատժամիջոցների կիրառման հնարավորության մասին։Դա վերաբերվում է այն անձանց, ովքեր խաթարում են Վրաստանի ժողովրդավարական ուղին։
-Եթե Վրաստանն ընկնի, եթե Վրաստանը չգտնի անհրաժեշտ պաշտպանությունը Արևմուտքում, ի՞նչ կլինի հետխորհրդային մյուս երկրների հետ, այդ թվում՝ Հայաստանի հետ։
-Եթե Վրաստանն ընկնում է, և ընկնում է Ռուսաստանի ազդեցության տակ, ապա դա շատ տխուր նորություն է, որովհետև թույլ Ռուսաստանի ազդեցության տակ ընկնելը տարածաշրջանում նվազագույնը կնշանակի Հայաստանի ու Ադրբեջանի լայնամասշտաբ պատերազմ։ Եթե Վրաստանը փակվում է, ապա Հայաստանը կա՛մ պետք է Ադրբեջանի հետ պայմանավորվի, կա՛մ Ադրբեջանը Թուրքիայի հետ միջանցք կստանա։ Բայց ես կարծում եմ, որ նման բան տեղի չի ունենա, որովհետև նման բան թույլ չեն տա։
