Նախօրեին պարզ դարձավ, որ ՀՀ կրթության, գիտության, մշակույթի և սպորտի նախարարության ու «Գագիկ Ծառուկյան» բարեգործական հիմնադրամի միջև կնքվել է հուշագիր՝ ՀՀ Կոտայքի մարզի Հատիս լեռան վրա նոր հայտնաբերված ամրոցի հետագա հնագիտական ուսումնասիրության, ամրակայման և վերականգնման աշխատանքների շուրջ համագործակցության վերաբերյալ: Հուշագիրը կնքվել է՝ կարևորելու պատմամշակութային ժառանգության արժեքն ու հետագա սերունդներին փոխանցելու անհրաժեշտությունը, օժանդակելու պատմության և մշակույթի հուշարձանների վերականգնմանն ու օգտագործմանը:
Արդյոք այս հուշագրի ստորագրումից հետո Գագիկ Ծառուկյանը հրաժարվե՞լ է Հիսուս Քրիստոսի արձանի տեղադրումից։ ԿԳՄՍ լրատվական ծառայությունից «Առաջին լրատվական»-ին տեղեկացրին, որ հուշագիրը վերաբերում է բացառապես Հատիս լեռան վրա նոր հայտնաբերված ամրոցի ամրակայման և վերականգնման աշխատանքներին։
Գագիկ Ծառուկյանի մամուլի խոսնակ Իվետա Տոնոյանից «Առաջին լրատվական»-ը հետաքրքրվեց՝ արդյոք արձանի հարցը փակվա՞ծ է, թե դեռ շարունակում է մնալ օրակարգում։ Տոնոյանը նշեց, որ նախօրեին հուշագիր է կնքվել ՀՀ կրթության, գիտության, մշակույթի և սպորտի նախարարության ու «Գագիկ Ծառուկյան» բարեգործական հիմնադրամի միջև Կոտայքի մարզի Հատիս լեռան վրա նոր հայտնաբերված ամրոցի հետագա հնագիտական ուսումնասիրության, ամրակայման և վերականգնման աշխատանքների շուրջ համագործակցության վերաբերյալ: Տոնոյանի խոսքով՝ Գագիկ Ծառուկյան հիմնադրամը պատրաստակամություն է հայտնել նաև անհրաժեշտ ֆինանսական աջակցություն տրամադրել այս հետազոտությունները և ուսումնասիրություններն իրականացնելու համար։
Ինչ վերաբերում է Հիսուս Քրիստոսի մոնումենտալ արձանի կառուցման գործընթացներին, ապա, Տոնոյանի խոսքով, ինչպես ավելի վաղ հայտարարվել էր Ծառուկյան բարեգործական հիմնադրամի կողմից, ամենն ինչ կատարվել և կատարվելու է բացառապես օրենսդրության շրջանակներում, և այլ տարբերակ պարզապես չկա.
«Հիսուս Քրիստոսի մոնումենտալ արձանի կառուցման գաղափարից հրաժարվելու թեմա ընդհանրապես չկա, ինչպես ժամանակ առ ժամանակ մամուլում շրջանառվում է այս թեզը։ Պետք է նշեմ, որ բարեգործական հիմնադրամը երբեք և ոչ մի պայմաններում լավ գաղափարներից և լավ ծրագրերից չի հրաժարվել և որևէ դժվարություն կամ խոչընդոտ երբևէ չի ստիպել մեզ հետ կանգնել մեր երկրի և ժողովրդի համար լավ բան անելու ցանկությունից։ Այնպես որ մենք այժմ առաջնորդվում ենք այս գործընթացով, և եթե առաջիկայում նոր գործընթաց լինի, այդ մասին մենք կտեղեկացնենք հանրությանը»,-ասաց նա։