Թուրքիայի նախագահ Ռեջեփ Թայիփ Էրդողանը հայտարարել է, որ կանխատեսում էր հակամարտություն ընդդիմադիր դաշինքում, քանի որ, ըստ նրա, ընդդիմադիրներն «անհանգստանում են ոչ թե ժողովրդի, այլ իրենք իրենց համար»։
Ընդդիմադիր Մերալ Աքշեներն ավելի վաղ հայտարարել էր, որ «վեցի դաշինքն» այլևս չի արտացոլում ժողովրդի իրական շահերը։ Հակամարտությունը ծագել է այն պատճառով, որ հինգ կուսակցություններ առաջարկել են Ժողովրդահանրապետական կուսակցության առաջնորդ Քեմալ Քըլըչդարօղլուի թեկնածությունը, իսկ մեկ կուսակցություն քննարկում է Ստամբուլի և Անկարայի քաղաքապետեր Էքրեմ Իմամօղլուի և Մանսուր Յավասի թեկնածությունները։ .
«Նրանք նստեցին, խոսեցին, բաժանվեցին։ Մենք անհանգստանում ենք մարդկանց կյանքերի համար, նրանք անհանգստանում են իրենց ունեցվածքի համար։ Ինչ էլ որ անեն, մենք մեր ճանապարհով ենք գնում։ Մենք մի քանի ամիս առաջ ասել ենք, որ դա տեղի կունենա», – ասել է Էրդողանը։
Ավելի վաղ Թուրքիայի նախագահը հայտարարել էր, որ երկրում նախագահական ընտրությունները տեղի կունենան մայիսի 14-ին։