Շատ հպարտ եմ Հայաստանում ԵՄ առաքելությամբ, այն մեծ ներդրում է ունենալու: Այս մասին, այսօր՝ մարտի 2-ին, Բեռլինում ՀՀ վարչապետ Նիկոլ Փաշինյանի հետ մամուլի ասուլիսի ժամանակ հայտարարեց Գերմանիայի կանցլեր Օլաֆ Շոլցը՝ պատասխանելով «Առաջին լրատվական»-ի հարցին:
Լրագրողը հարց էր հնչեցրել. «Հայաստանում ԵՄ դիտորդների տեղակայվելուց հետո շատերը նշում են, որ Հայաստանի և ԵՄ-ի միջև հարաբերությունների նոր պայմանագիր է պետք, որը կներառի նաև անվտանգության բաղադրիչը: Այսինքն ԵՄ-ի հետ իրավապայմանագրային հիմքը՝ CEPA-ն, այլևս չի համապատասխանում ԵՄ-ի հետ Հայաստանի այս պահին ունեցած բարձր մակարդակի հարաբերություններին: Կա՞ այդպիսի օրակարգային հարց, թե ոչ: Նաև կա՞ ԵՄ առաքելության թվակազմը ընդլայնելու հնարավորություն»:
«Մենք զարգացնենք այդ առաքելությունը, մնացածը կտեսնենք»,-հավելեց Շոլցը:
Իր հերթին ՀՀ վարչապետ Նիկոլ Փաշինյանն ասաց. «Մենք շատ ուրախ ենք կայացված որոշման համար: ԵՄ դիտորդական առաքելության ներկայությունը կարգավորվում է փոխադարձ պաշտոնական նամակներով, բայց մենք ունենք նաև պայմանավորվածություն, որ այդ ներկայությունը կարգավորող պայմանագիր պետք է քննարկվի, բանակցվի և ստորագրվի: Կարծում եմ՝ մոնիտորինգի առաքելության ներկայությունը կարգավորող փաստաթուղթ մենք առաջիկայում հնարավոր է ստորագրենք: Առաջաիկայում, երբ կբանակցենք և ընդհանուր համաձայնության կգանք արդեն իսկ համաձայնությունների, ձևակերպումների շուրջ»:
