ԱՄՆ-ի պետքարտուղար Էնթոնի Բլինքենը հայտարարել է, որ չի պլանավորում շփվել իր ռուս և չինացի գործընկերների հետ G20-ի երկրների նախարարների հանդիպման ժամանակ:
Այդ մասին տեղեկանում Է «РИА Новости» գործակալությունից: «Ես չեմ պլանավորում նրանց հետ հանդիպել G20-ում»,- ասել է Բլինքենը Տաշքենդից Նյու Դելի մեկնելուց առաջ: Դրա հետ մեկտեղ նա նշել է, որ պլանավորում է մասնակցել նիստերին, որտեղ ներկա կգտնվեն նաև Ռուսաստանի ու Չինաստանի նախարարները։
«Մեծ քսանյակի» երկրների ԱԳ նախարարությունների ղեկավարների հանդիպումն անցկացվում է մարտի 1-2-ին: Հնդկաստանը G20-ի նախագահությունն ստանձնել է անցյալ տարվա դեկտեմբերի 1-ին: Նախագահության ընթացքում Նյու Դելին ավելի քան 200 հանդիպում կանցկացնի խմբի շրջանակներում, սակայն արտգործնախարարների հանդիպումն ամենակարևոր իրադարձություններից մեկն է G20-ի ղեկավարների եզրափակիչ գագաթնաժողովի նախաշեմին, որը տեղի Է ունենալու սեպտեմբերի 9-10-ը Հնդկաստանի մայրաքաղաքում: Դրանից հետո G20-ի նախագահությունը կփոխանցվի Բրազիլիային:
Մարտի 1-2-ը Նյու Դելիում անցկացվող երկօրյա միջոցառմանը ներկա կլինեն G20-ի անդամ երկրների արտաքին գործերի նախարարները, ինչպես նաև Հնդկաստանի կողմից հատուկ հրավիրված նախարարներ ու միջազգային կազմակերպություններ, որոնք չեն մտնում ,Մեծ քսանյակիե մեջ։ Ընդհանուր առմամբ, միջոցառմանը մասնակցում են 40 երկրների ներկայացուցիչներ։
