Հայաստանում ծնելիության ցուցանիշը 2022 թվականին 2021 թվականի համեմատ նվազել է, սակայն 2023 թվականի հունվարին որոշակի դրական դինամիկա է արձանագրվել։ Ազգային ժողովում Կառավարության անդամների հետ հարց ու պատասխանի ժամանակ այս մասին ասաց Առողջապահության նախարար Անահիտ Ավանեսյանը։
«Վիճակագրությամբ տեսնում ենք, որ 2020 թվականի ընթացքում և 2021 թվականի առաջին կիսամյակում արձանագրվել է ամուսնությունների նվազում, բայց պետք է ասեմ, որ 2023 թվականի հունվար ամիսը մեզ որոշակի հույս է տալիս, որ այդ տենդենցը հակառակ ուղղությամբ է այս տարի գնալու։ Մենք այս տարի հունվարի ամսին արձանագրել ենք վերջին երեք տարիների ընթացքում հունվար ամիսների կտրվածքով ամենաբարձր ծնելիությունը։ Առաջին անգամ 3000 հազարը հատել ենք հունվար ամսին»,- ասաց Ավանեսյանը։
Խոսելով ընտանիքներում երրորդ և չորրորդ երեխաների ծննդի մասին, Ավանեսյանը ասաց, որ տասը տարվա կտրվածքով գրեթե կրկնապատկվել է երրորդ և չորրորդ երեխաների թիվը։
Ավանեսյանի խոսքով՝ 2020 թվականի պատերազմի համատեքստում հասարակության տրամադրությունների, ընկալումների մեջ փոփոխություն է եղել, և տղա երեխաների հետ կապված վիճակագրությունը փոխվել է։
«Իհարկե, պետք է շարունակել հանրային արշավների քաղաքականությունը, աշխատանքը կրթական, հանրային ընկալումների փոփոխման, նաև՝ արգելքների խստացման։ Բայց միայն արգելքներն արդյունք չեն տալիս, համալիր գործողություններ պետք է լինեն»,- եզրափակեց Ավանեսյանը։
