Ռուսաստան նախագահ Դմիտրի Մեդվեդևի նպատակը ղարաբաղյան հակամարտության «Կարգավորման հիմնական սկզբունքները» անվանումով առաջին կոլեկտիվ համընդգրկուն փաստաթղթի մշակումն է։ Այս մասին Голос России ռադիոկայանին տված հարցազրույցում հայտարարել է ՌԴ արտգործնախարար Սերգեյ Լավրովը։
Ի պատասխան այն հարցին, թե «Աստանայում կայանալիք գագաթնաժողովի մասնակիցների հիմնական գլխացավը ղարաբաղյան հիմնախնդիրն է։ Ինչ եք կարծում, կարելի՞ է որոշ տեղաշարժեշ ակնկալել գագաթնաժողովից խնդրի առնչությմաբ», Լավրովը հայտարարել է.
«Ռուսաստանը՝ որպես ԵԱՀԿ Մինսկի խմբի համանախագահ երկրներից մեկը, զբաղվում է ղարաբաղյան հակամարտության կարգավորմամբ, ինչպես նաև իր ազգային հատկանիշով՝ հաշվի առնելով մեր բարի հատուկ հարաբերությունները և՛ Հայաստանի, և՛ Ադրբեջանի հետ։ Ռուսաստանի նախագահ Դմիտրի Մեդվեդևն անձամբ է զբաղվում այդ հարցով։ Նա արդեն յոթ-ութ հանդիպում է անցկացրել Հայաստանի և Ադրբեջանի նախագահների հետ, որոնց ընթացքում լուրջ փորձ է արվել ներթափանցել առայժմ պահպանվող տարաձայնությունների դաշտ և հաղթահարել տարաձայնությունները: Նրա նպատակն է մշակել ղարաբաղյան հակամարտության «Կարգավորման հիմնարար սկզբունքները» անվանումով առաջին կոլեկտիվ համապարփակ փաստաթղթը, որը որպես իրավաբանական պարտավորեցնող փաստաթուղթ կմատնանշեր արդեն խաղաղ համաձայնագրի առնչությամբ իրականացվելիք աշխատանքների հիմնական ուղղությունները: Սկզբունքների մեծամասնության շուրջ, որոնք կարող են ընկած լինել կարգավորման հիմքում, ընկալում է ձեռքբերվել: Բայց լուրջ տարաձայնություններն առայժմ պահպանվում են»։
Ապա Ռուսաստանի ԱԳ նախարարը հավելել է. «Մենք սերտ համագործակցում ենք ամերիկացի և ֆրանսիացի համանախագահների հետ։ Աստանայի գագաթնաժողովի նախօրեին ԵԱՀԿ Մինսկի խմբի համանախագահները հանդիպել են Հայաստանի և Ադրբեջանի իշխանությունների հետ։ Նրանց հանձնարարված է Աստանայի գագաթնաժողովի համար պատրաստել այնպիսի հայտարարություն, որի տակ կկարողանան ստորագրել և՛ Երևանը, և՛ Բաքուն, և՛ համանախագահները: Հուսով եմ, որ դա տեղի կունենա»: Ս.Լավրովը նաև նկատել է, որ վերջին շրջանում հարաբերական անդորր է նկատում շփման գծում: «Սակայն ես առայժմ չեմ կարող ասել, որ Աստանայի գագաթնաժողովում կհաջողվի բեկում արձանագրել հենց հակամարտության կարգավորման առնչությամբ։ Դա քրտնաջան աշխատանք է պահանջում»: Ամփոփելով` Ռուսաստանի ԱԳ նախարարը հայտարարել է. «Եթե Աստանայի գագաթնաժողովն օգնի հետագա առաջընթացին, ապա դա արդեն լուրջ ձեռքբերում կլինի»:
ՌԴ ԱԳ նախարար Ս.Լավրովի ելույթը կարդալ և ունկընդրել կարելի է այս հասցեով` http://rus.ruvr.ru/_print/35940921.html:
