Հանուն Հանրապետության կուսակցության ղեկավար Արման Բաբաջանյանը ֆեյսբուքյան իր էջում գրել է. Վերջին շաբաթներին բոլորին հայտնի քրեաօլիգարխիկ շրջանակներին սպասարկող մի փոքրիկ շրջանակ ուղղորդված արշավ է սկսել փաստաբան, իրավապաշտպան, մեր գաղափարակից ընկեր և համախոհ, իսկ ներկայում Սահմանադրական դատարանի դատավոր Սեդա Սաֆարյանի դեմ:
Անտեսելով իրավական և բարոյական տարրական կանոնները՝ նշյալ շրջանակի մասնակիցները կեղծ և անհիմն մեղադրանքներ են ուղղում Սեդա Սաֆարյանին՝ իբր վերջինս փաստաբանի արտոնագիրը կասեցվելուց հետո զբաղվել է փաստաբանական և ձեռնարկատիրական գործունեությամբ:
Բացարձակ անհիմն այս պնդումները հիմնավորապես հերքվել են թե՜ Սեդա Սաֆարյանի և թե՛ բարեխիղճ փաստաբանական, իրավապաշտպան և հասարակական շրջանակների կողմից:
Զավեշտալի է, որ երկիրը տասնամյակներ շարունակ լափած, կեղեքած և ծանրագույն պարտությունների հասցրած մարդիկ, ովքեր կամազուրկ իշխանության անգործության պատճառով միայն պատահականորեն դեռ ճաղերի հետևում չեն հայտնվել, մարդու իրավունքների պաշտպանության համար տարիների անխոնջ մարտիկին, իր կյանքն ու առողջությունը հայ ժողովրդի խոցված և բռնադատված խավերի պաշտպանությանը նվիրաբերած մարդուն մեղադրում են այն բանի մեջ, ինչն իրենք են արել ողջ գիտակցական կյանքում՝ խաբել, օրենք շրջանցել և ապօրինի հարստանալ:
Սեդա Սաֆարյանի դեմ այս արշավի իրական պատճառը Սահմանադրական դատարանում վերջինիս սկզբունքային գործունեությունն է, որը փակում է նախկին իշխանությունների ապօրինությունների կոծկման շատ կարևոր մի ատյանի դուռը գողապետերի, գողերի, զեղծարարների և մարդասպանների համար:
Հանուն Հանրապետության կուսակցության անունից դատապարտում եմ Սեդա Սաֆարյանի դեմ ծավալվող կեղտոտ հակաքարոզչությունն ու քրեաօլիգարխիայի բանսարկու վարքագիծը հայտնի իրավապաշտպանի նկատմամբ և անվերապահ աջակցություն հայտնում Սեդա Սաֆարյանին:
Արման Բաբաջանյան
Հանուն հանրապետության կուսակցություն
նախագահ
Լուսանկարում՝ 2021թ. ԱԺ արտահերթ ընտրությունների շրջանակում՝ Երևանի մետրոպոլիտենում քարոզարշավի ժամամանակ:
Տիկին Սեդա Սաֆարյանը Շիրինյան-Բաբաջանյան ընտրական դաշինքի երրորդ համարն էր:
