Ինչպես հաղորդում է եգիպտական Al-Misr Al-Yom լրատվական կայքը, Եգիպտոսում շարունակվում են բախումները իշխանությունների, խորհրդարանական ընտրություններում հաղթած Ազգային-ժողովրդավարական կուսակցության (ԱԺԿ) և ընտրություններից դժգոհ ցուցարարների միջև: Բախումները տեղի են ունեցել երկրի տարբեր մասերում, որի արդյունքում առնվազն 3 մարդ զոհվել է, մի քանի տասնյակ մարդ վիրավորվել է: Բախումները սկսել են կիրակի լույս երկուշաբթի առավոտյան, որի հետևանքով զոհվել էր ընդդիմության թեկնածուի որդին:
Այս ընտրություններում ջախջախիչ հաղթանակ է տարել գործող Ազգային-ժողովրդավարական կուսակցությունը, որը գլխավորում է Եգիպտոսի անփոխարինելի նախագահ Հոսնի Մուբարաքը: Մինչև ընտրությունները՝ իշխանություններին հաջողվել էր ամբողջությամբ չեզոքացնել ընդդիմադիր «Մուսուլման եղբայրներ» կազմակերպության անդամներին, նրանց առաջնորդներից շատերը ձերբակալվել էին, իսկ գրանցված թեկնածուներին՝ անօրինական զրկել ընտրություններին մասնակցելու իրավունքից: «Մուսուլման-եղբայրներ» կազմակերպությունը, որն արդեն երկար տարիներ արգելված է Եգիպտոսում, ընտրություններին նախատեսում էր մասնակցել անկախ պատգամավորներով և այսօրվա խորհրդարանի 88 մանդատն ավելացնել մինչև 135-ի: Սակայն նրանք արդեն հայտարարել են, որ իրենց ներկայացուցիչները խորհրդարանում չեն լինի:
